काठमाडौं । राष्ट्रप्रमुख, प्रधानमन्त्री तथा उच्च पदस्थ व्यक्तिहरूको सम्पत्ति छानबिन गर्नुपर्ने माग गर्दै नेकपा (बहुमत)ले आन्दोलनको घोषणा गरेको छ। मंगलबार काठमाडौंको संवाद डबलीमा आयोजित पत्रकार सम्मेलनमार्फत पार्टीको ३ नम्बर ब्यूरोले आफ्नो माग सुनुवाइ नभए सशक्त आन्दोलन गर्ने चेतावनी दिएको छ।
भ्रष्टाचारविरुद्ध कडा कदम उठाउने चेतावनी
नेकपा (बहुमत)का ३ नम्बर ब्यूरो इन्चार्ज उदयबहादुर चलाउने ‘दीपक’ले भ्रष्टाचारलाई देशको प्रमुख शत्रु भन्दै उच्च ओहदाका व्यक्तिहरू नै अनियमितताका कारक भएको आरोप लगाए। उनले सम्पत्ति छानबिनको माग गर्दै आउँदो चैत २४ गतेदेखि वैशाख ९ गतेसम्म माईतीघर मण्डलामा धर्ना दिने घोषणा गरे।
चलाउनेले भने, “देशलाई समृद्ध बनाउन हरेक उच्च पदस्थ व्यक्तिहरूको सम्पत्ति छानबिन गरिनुपर्छ। यदि कसैले राज्यकोषको अपचलन गरेको पुष्टि भए, त्यो सम्पत्ति राष्ट्रियकरण गर्नुपर्छ।”
कुलमान घिसिङ बर्खास्तीमा व्यवसायीले चलखेल गरेको आरोप
उनले नेपाल विद्युत प्राधिकरणका कार्यकारी निर्देशक कुलमान घिसिङलाई हटाउनुको पछाडि ऊर्जामन्त्री दीपक खड्काको स्वार्थ रहेको आरोप लगाए। “ऊर्जामन्त्री खड्का जल तथा विद्युत व्यवसायी हुन्। कुलमानले उनीहरूलाई चलखेल गर्न नदिएपछि हटाइयो,” उनले भने।
“जब उच्च पदस्थ व्यक्तिहरू नै राज्यकोष लुट्न उद्यत हुन्छन्, तब देश कसरी समृद्ध हुन्छ? भ्रष्टाचारको जरो नै यस्ता व्यक्तिहरू हुन् भने जनताले समृद्धिको आशा कसरी गर्ने?” उनले प्रश्न गरे।
पार्टी नेताहरूको ऐक्यबद्धता
पत्रकार सम्मेलनमा पार्टीका केन्द्रीय सदस्य तथा ललितपुर जिल्ला इन्चार्ज कुमाल सिलवालले भ्रष्टाचारको जालो तोड्न नेकपा (बहुमत)ले आन्दोलनको घोषणा गरेको जानकारी दिए। कार्यक्रममा काठमाडौं जिल्ला इन्चार्ज सागर लिम्बु, भक्तपुर जिल्ला इन्चार्ज प्रतिमा बजगाई, चितवन जिल्ला इन्चार्ज रक्तिम, काठमाडौं सेक्रेटरी दर्शन कुमार नेपाली लगायत नेताहरूको उपस्थिति थियो।
नेकपा (बहुमत)ले सम्पत्ति छानबिनका लागि सरकारलाई दबाब दिने विभिन्न कार्यक्रम घोषणा गरेको छ। यदि सरकारले माग सुनुवाइ नगरे, थप सशक्त आन्दोलन गरिने चेतावनी दिइएको छ। देशमा व्याप्त भ्रष्टाचारको अन्त्य गर्दै शुद्ध प्रशासनिक प्रणाली स्थापनाका लागि नेकपा (बहुमत)ले जनस्तरबाट दबाब सिर्जना गर्ने रणनीति लिएको बताएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया