काठमाडौं । नबिल बैंकले एकसाथ चारवटा प्रतिष्ठित अवार्डहरू प्राप्त गरेको छ । ४०औँ वार्षिकोत्सवका कार्यक्रमहरू मनाउँदै गर्दा बैंकले यी महत्त्वपूर्ण अवार्डहरूबाट सम्मानित भएको हो । यस उपलब्धिले बैंकको वित्तीय पारदर्शिता, जवाफदेहिता, सुशासन र उत्कृष्ट सेवाको मान्यता थप सुदृढ गरेको पुष्टि भएको छ ।
बैंकको ४० वर्षे अनवरत यात्रामा धेरै उपलब्धि हासिल भएको नबिल बैंकका प्रमुख कार्यकारी अधिकृत ज्ञानेन्द्रप्रसाद ढुंगानाले बताए । उनले भने, ‘नवीन प्रयोग र ग्राहकको सुविधामा हाम्रो ध्यानले हामीलाई यी अवार्डहरू दिलाएको छ, जुन हाम्रा कर्मचारीको अथक मिहिनेतको फल हो । सबैलाई बधाई दिन चाहन्छु ।’
४०औँ वार्षिकोत्सवको अवधिमा बैंकले पाएका अवार्डहरू
नेसनल वेस्ट प्रिजेन्टेड एनुअल रिपोर्ट अवार्ड (एनबीपीए) २०२३
नबिल बैंकले नेपाल चार्टर्ड एकाउन्टेन्ट्स संस्था (आईक्यान)बाट वाणिज्य बैंकतर्फको उत्कृष्ट वित्तीय प्रतिवेदन अवार्ड (गोल्ड) जितेको छ । यो अवार्ड बैंकलाई आर्थिक वर्ष २०२२/२३ मा प्रकाशित वार्षिक प्रतिवेदनका आधारमा प्रदान गरिएको हो ।
बैंकको वित्तीय पारदर्शिता, जवाफदेहिता र सुशासनलाई सम्मान गर्दै यो अवार्ड प्रदान गरिएको हो । काठमाडौंमा आयोजित एक विशेष समारोहमा अर्थमन्त्री विष्णुप्रसाद पौडेलले उक्त अवार्ड हस्तान्तरण गरेका थिए । नबिलबैंकका तर्फबाट नायब प्रमुख कार्यकारी अधिकृत मनोजकुमार ज्ञवाली र वित्त तथा योजना विभाग प्रमुख सन्दीपबाबु पौडेलले अवार्ड ग्रहण गरेका थिए ।
बेस्ट कमर्सियल बैंकिङ ब्रान्ड अवार्ड नेपाल २०२४
नबिल बैंकले संयुक्त अधिराज्य (यूके)को ग्लोबल ब्रान्ड्स म्यागेजिनबाट यस वर्षको ‘बेस्ट कमर्सियल बैंकिङ ब्रान्ड अवार्ड नेपाल २०२४’ प्राप्त गरेको छ । ग्लोबल ब्रान्ड्स म्यागेजिन ठूलो प्रकाशन गृहमध्येको एक हो । यसले हरेक वर्ष बैंकिङ क्षेत्रका अग्रणी, उत्कृष्ट सेवा तथा दृष्टिकोण प्रदर्शन गर्ने बैंकहरूका लागि अवार्ड आयोजना गर्दै आइरहेको छ । यस सम्मानले बैंकिङ क्षेत्रमा नबिल बैंकको उत्कृष्ट सेवा र दूरदर्शी दृष्टिकोणलाई थप सुदृढ बनाएको पुष्टि भएको छ । अवार्डका लागि बाह्य अनुसन्धान तथा मूल्यांकन टोलीले गरेको सिफारिसका आधारमा बैंकले यो अवार्ड प्राप्त गरेको हो ।
नेपालको बेस्ट बैंक फर कर्पोरेट सोसियल रेस्पोन्सिबिलिटी (सीएसआर), युरोमनि अवार्ड फर एक्सिलेन्स, २०२४
नबिल बैंकले युरोमनि अवार्ड फर एक्सिलेन्स २०२४ अन्तर्गत नेपालको वेस्ट बैंक फर कर्पोरेट सोसियल रेस्पोन्सिबिलिटी (सीएसआर) प्राप्त गरेको छ । सामाजिक उतरदायित्वअन्तर्गत देशमा पुर्याएको योगदानको कदरस्वरुप यो अवार्ड बैंकले हासिल गरेको हो ।
संस्थागत सामाजिक उत्तरदायित्वका कार्यक्रमलाई दिगो विकासका लक्ष्य केन्द्रित गर्दै समाजको सकारात्मक परिवर्तनका लागि बैंकले स्वास्थ्य, शिक्षा, उद्यमशीलता, संस्कृतिको जगेर्ना तथा प्रवर्द्धन, सूचना प्रविधि आदि क्षेत्रमा कार्यक्रमहरू सञ्चालन गर्दै समाजमा टेवा पुर्याउँदै आएको छ । बैंकले नबिल स्कुल अफ सोसल इन्टरप्रेनरसिप (नबिल एसएसई) कार्यक्रम २०७८ मंसिरदेखि सुरु गर्दै सामाजिक उद्यमशीलतालाई देशव्यापी रूपमा सञ्चालन गर्दै आएको छ ।
नेपालको बेस्ट बैंक फर एसएमइज, युरोमनी अवार्ड फर एक्सिलेन्स २०२४
नबिल बैंकले युरोमनी अवार्ड फर एक्सिलेन्स २०२४ अन्तर्गत नेपालको बेस्ट बैंक फर एसएमइजतर्फको अवार्ड पनि हासिल गर्न सफल भएको छ । सन् १९९२ मा स्थापना भएको यो अवार्ड विश्व बैंकिङ क्षेत्रमा सुरु गरिएको पहिलो अवार्ड हो । यसले बैंकको गुणस्तरीय सेवा, सिर्जनात्मकता र ग्राहकप्रतिको विशेषज्ञतालाई सम्मानित गर्दछ । यो अवार्ड विश्वका १०० वटा देशमा सञ्चालन हुँदै आएको छ ।
‘बैंकले नवीनतम कामका लागि देखाएको प्रतिबद्धता, सामाजिक उतरदायित्वअन्तर्गत पुर्याएको योगदान, गुणस्तरीय ब्रान्डिङ र साना तथा मझौला व्यवसायको विस्तारमा गरेको उत्कृष्ट प्रदर्शनले यी अन्तर्राष्ट्रिय अवार्डहरू पाएको हो । यसले हामीलाई थप ऊर्जा मिलेको छ,’ ढुंगानाले बताए ।
नबिल बैंक नेपालको अग्रणी वाणिज्य बैंकहरूमध्ये एक हो । यस बैंकले २४ लाखभन्दा बढी सेवाग्राहीलाई २६८ शाखा र ३१६ एटीएममार्फत सेवा प्रदान गर्दै आइरहेको छ । नबिल बैंकले ४० वर्षदेखि नेपाली बैंकिङ क्षेत्रमा नवीनतम सेवाहरूको सुरुवात गर्दै महत्त्वपूर्ण भूमिका खेलेको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया