काठमाडौं। प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच शुक्रबार महत्वपूर्ण भेटवार्ता हुने भएको छ। बिम्स्टेक (बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास) सम्मेलनका क्रममा उनीहरूबीच भेटवार्ता तय भएको हो।
परराष्ट्र मन्त्री आरजु राणा देउवाका प्रेस सल्लाहकार एकराज पाठकका अनुसार, शुक्रबार अपराह्न हुने वार्तामा दुई देशबीचको आपसी सम्बन्ध, व्यापारिक सहकार्य, भौतिक पूर्वाधार विकास, ऊर्जा सहयोग, र क्षेत्रीय स्थिरताका विषयमा छलफल हुनेछ।
प्रधानमन्त्री ओली बिम्स्टेक सम्मेलनमा भाग लिन थाइल्याण्ड पुगिसकेका छन् भने भारतीय प्रधानमन्त्री मोदी पनि सम्मेलनका लागि त्यहाँ जाँदैछन्। सम्मेलनकै क्रममा ओली र मोदीबीच साइडलाइन वार्ता हुने निश्चित भएको छ।
यसअघि, गत असोज ७ गते अमेरिकाको न्युयोर्कमा संयुक्त राष्ट्रसंघको महासभाका क्रममा दुबै नेताबीच भेटवार्ता भएको थियो। सो अवसरमा न्युयोर्कस्थित लोटे प्यालेस होटलमा करिब ३० मिनेट छलफल भएको थियो।
यो पटकको भेटवार्तामा नेपाल–भारत सम्बन्धलाई अझ बलियो बनाउन तथा बिम्स्टेकको प्रभावकारिता बढाउने विषयमा गम्भीर छलफल हुने अनुमान गरिएको छ। वार्ताको नतिजाले दुवै देशका नागरिकलाई प्रभाव पार्ने भएकाले सबैको चासो यसतर्फ रहेको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया