काठमाडौँ । मधेस केन्द्रित सात राजनीतिक दलहरूले आज संघीय लोकतान्त्रिक मधेसी मोर्चा गठन गर्ने घोषणा गरेका छन्। यस मोर्चाले आलोपालो नेतृत्व गर्ने सहमतिसहित अगाडि बढ्ने निर्णय गरेको छ।
सुरुमा आठ दल सम्मिलित मोर्चा बनाउने तयारी भए पनि जनता समाजवादी पार्टी (जसपा) बाट अलग्गिएका अशोक राई नेतृत्वको समूह अन्तिम समयमा बाहिरिएको छ।
अहिले सात दलको मोर्चामा उपेन्द्र यादव नेतृत्वको जनता समाजवादी पार्टी नेपाल, महन्थ ठाकुर नेतृत्वको लोकतान्त्रिक समाजवादी पार्टी नेपाल, डा सीके राउत नेतृत्वको जनमत पार्टी, राजेन्द्र महतो नेतृत्वको राष्ट्रिय मुक्ति पार्टी नेपाल, हृदयेश त्रिपाठी नेतृत्वको जनता प्रगतिशील पार्टी, रेसम लाल चौधरी संरक्षक रहेको नागरिक उन्मुक्ति पार्टी र वृशेषचन्द्र लाल नेतृत्वको तराई मधेस लोकतान्त्रिक पार्टी रहने छन् ।
पहिलो चरणको नेतृत्व उपेन्द्र यादवलाई
मोर्चाले आलोपालो नेतृत्व गर्ने सहमति गरेअनुसार पहिलो चरणमा जनता समाजवादी पार्टी नेपालका अध्यक्ष उपेन्द्र यादवले नेतृत्व सम्हाल्ने छन्। तर, स्रोतका अनुसार नागरिक उन्मुक्ति पार्टीको सहभागिता अझै अनिश्चित छ। लोसपाका एक नेताले भने, “अहिलेको सूचीमा नागरिक उन्मुक्ति पार्टी समेटिएको छ, तर अन्तिम समयमा के हुन्छ भन्ने टुंगो छैन।”
कांग्रेस-एमाले नेतृत्वको वर्तमान गठबन्धन सरकारले संविधान संशोधन गरी थ्रेसहोल्ड बढाउने, समानुपातिक निर्वाचन प्रणाली हटाउने र दुई दलीय प्रणालीतर्फ अग्रसर हुने चर्चाहरू चलेपछि मधेस केन्द्रित दलहरूबीच मोर्चा निर्माणको आवश्यकता महसुस भएको हो।
जनता प्रगतिशील पार्टीका अध्यक्ष हृदयेश त्रिपाठीले मोर्चा गठनका लागि महत्वपूर्ण भूमिका खेलेका थिए। उनले मधेस केन्द्रित दलका नेताहरूसँग निरन्तर छलफल गर्दै मोर्चा निर्माणको आधार तयार गरेका थिए।
मोर्चाले आफ्नो उद्देश्य, मापदण्ड, आचारसंहिता तथा साझा मुद्दाहरू तय गर्न दुईवटा कार्यदल गठन गरिसकेको छ। यी कार्यदलहरूले प्रतिवेदन बुझाएपछि मोर्चा घोषणा गर्ने तयारी भएको हो।
यो मोर्चाले मधेसको हकहितका लागि कस्तो रणनीति अपनाउनेछ र यसको प्रभाव राष्ट्रिय राजनीतिमा कत्तिको पर्नेछ त्यो हेर्न बाँकी छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया