बैंकक। थाइल्यान्डको एसियन इन्स्टिच्युट अफ टेक्नोलोजी (एआइटी) मा आयोजित विशेष कार्यक्रममा प्रधानमन्त्री केपी शर्मा ओलीले मानव जातिको सुरक्षित र समृद्ध भविष्यका लागि साझा प्रयास आवश्यक रहेको बताएका छन्।
थाइल्यान्ड भ्रमण तथा बिम्स्टेकको छैठौं शिखर सम्मेलन मा सहभागी हुन बैंकक पुगेका प्रधानमन्त्री ओलीले सम्बोधन गर्दै जलवायु परिवर्तन, समृद्धि, सुरक्षा र आत्मसम्मान जस्ता विषयहरूमा नेपाल सरकारको पहलबारे जानकारी गराए।
प्रधानमन्त्री ओलीले ‘समृद्ध नेपाल, सुखी नेपाली’ अभियानबारे स्पष्ट पार्दै वैज्ञानिक अनुसन्धान, आधुनिक कृषि, र मानव संसाधन विकास लाई प्राथमिकता दिनुपर्ने बताए। उनले एआइटी जस्ता संस्थाहरूले नेपालको जलस्रोत, प्रविधि र विकासका क्षेत्रमा महत्वपूर्ण योगदान गर्नसक्नेमा विश्वास व्यक्त गरे।
उनले एआइटीमा नेपाली विद्यार्थीहरूको अध्ययन र अनुसन्धानलाई प्रवर्द्धन गर्न एक लाख अमेरिकी डलर कोष स्थापना गर्ने घोषणा समेत गरे।
थाइल्यान्डका लागि नेपाली राजदूत धनबहादुर वली का अनुसार, नेपाल एआइटीमा विद्यार्थी पठाउने चौथो ठूलो देश हो। हाल १ सय ८१ नेपाली विद्यार्थी एआइटीमा अध्ययनरत छन् भने हालसम्म १ हजार ७९५ नेपाली विद्यार्थी यो प्रतिष्ठित संस्थाबाट स्नातक भइसकेका छन्।
एआइटीको बोर्ड अफ ट्रष्टीमा तीन जना नेपाली सदस्य छन् भने सात जना नेपाली प्राध्यापक समेत कार्यरत छन्। प्रधानमन्त्री ओली, प्रथम महिला राधिका शाक्य, परराष्ट्रमन्त्री डा. आरजु राणा देउवा, र प्रधानमन्त्रीका मुख्य सल्लाहकार विष्णुप्रसाद रिमाल सहितको टोलीलाई एआइटीका प्रेसिडेन्ट प्रा. पाइ ची ली ले स्वागत गरेका थिए।
प्रधानमन्त्री ओलीले थाइल्यान्डका प्रधानमन्त्री पे थोङ थान शिनावात्राको मैत्रीपूर्ण निमन्त्रणामा पहिलोपटक थाइल्यान्ड भ्रमण गरेका हुन्। उनले बिहीबार बिम्स्टेक सदस्य मुलुकका नेताहरूसँग साइडलाइन भेटवार्ता समेत गर्ने कार्यक्रम रहेको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया