काठमाडौँ । शुक्रबार राति ६.४ म्याग्निच्युडको भूकम्प गएको छ । राष्ट्रिय भूकम्प मापन केन्द्रका प्रमुख लोकविजय अधिकारीले राति ११ बजेर ४७ मिनेटमा जाजरकोट केन्द्रबिन्दु भएर सो भूकम्प गएको जानकारी दिएका छन् ।
जाजरकोटको रामेडाँडा आसपास केन्द्रबिन्दु भएर भूकम्प गएको मापन केन्द्रले पुष्टि गरेको छ । भूकम्पको धक्का सुदुरपश्चिम र काठमाडौँका साथै देशैभरजसो महसुश भएको थियो ।
भूकम्पबाट जाजरकोट, पश्चिम रुकुमसहितका जिल्लाहरुमा घरहरुमा क्षति पुगेको प्रारम्भिक विवरण प्राप्त भएको छ । रुकुमको दार्मा गाउँपालिका ५ भालुखोलामा रामु खड्का र अतिराम वलीले दिएको जानकारी अनुसार अतिराम वली, विरेन्द्र खड्का ,रामु खड्का, धन बहादुर, रीम बहादुर खड्का, दिपेश खड्कालगायतको घरहरु पूर्णरूपमा क्षति भएको खबर छ ।
यस्तै सिमलनेटा डन्ने टमटा र पाथिहाल्ना हिमबहादुर चन्दको घर, दार्मा ६ भुर्तिवाङमा विजय बस्नेतको घर, ६ गाेठिवन निबासी हरि बहादुर बस्नेत र निम बहादुर बस्नेतकाे घर पूर्णरुपमा क्षतिग्रस्त भएको छ ।
भूकम्पले रुकुम पश्चिमको आठबिकोट नगरपालिका १२ मा ४ जना घाइते भएको अपुष्ट खबर छ। यद्दपी प्रहरीले भने यो कुराको पुष्टि गरेको छैन। थप विवरण प्राप्त हुन सकेको छैन ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया