काठमाडौं । प्रधानमन्त्री केपी शर्मा ओलीले शनिबार काठमाडौं उपत्यकासहितका क्षेत्रमा आएको बाढीपछिको उद्धार र राहत प्रक्रियामा सरकारले सक्दो कोसिस गरिरहेको बताएका छन् ।
संयुक्त राष्ट्रसंघको ७९ औँ महासभामा भाग लिएर सोमबार काठमाडौं आएपछि सञ्चारकर्मीसँगको सवाल-जवाफमा उनले यस्तो बताएका हुन् ।
‘म फर्केर आएँ । विपद्को बेला सरकारको भूमिका देखिएन भन्ने सुनेँ । विरोधका लागि विरोध मात्रै नगरौँ । सरकारले गर्नेसम्मको प्रयास गरेको छ’, उनले भने, ‘सेना-प्रहरी खटाएको छ, उद्धार र राहत अभियान चलिरहेको छ । हामीले बाढी आउने कुरा रोक्न सकिँदैन थियो ।’
उनले बाढी-पहिरो पनि पूर्वसूचना दिएर नजाने बताउँदै सरकारले तदारुकताका साथ राहत पुर्याउने काममा लागेको पनि उनले बताएका छन् ।
‘म बाहिर हुँदा पनि मैले यस कामबारे सूचना लिइरहेको थिएँ । सरकारी निकायलाई पनि मैले निर्देशन गरेको छु । यस्तो संवेदनशील बेलामा सबै मिलेर चल्नु वाञ्छनीय हुन्छ’,उनले भने, ‘अब म आएँ, सरकारको भूमिका अझ प्रभावकारी हुन्छ । राहत र उद्धारलाई गति दिन्छौँ ।’
उनले मौसम पूर्वानुमान महाशाखाले बाढी-पहिरो आउने बताए पनि कुन ठाउँमा आएर क्षति गर्ने भन्ने पूर्वानुमान कसैले गर्न नसक्ने पनि बताए ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया