काठमाडौँ । लोकतान्त्रिक समाजवादी पार्टी नेपालले पार्टीका वरिष्ठ नेता राजेन्द्र महतोलाई कारबाही गर्ने भएको छ ।
वरिष्ठ नेता महतोले केही दिनदेखि पार्टीेको हितविपरीत गतिविधि गरिरहेको भन्दै उनलाई अनुशासनको कारबाही गर्ने तयारी भइरहेको छ ।
पार्टीका महासचिव डा.सुरेन्द्र झाले भने, ‘महतोज्यू पार्टीको दोस्रो मुख्य व्यक्ति हुनुहुुन्छ, र पार्टीकै विरुद्धमा बोल्दै हिँड्नु भएको छ । यो पार्टीको अनुशासन विपरीत कार्य हो । यसमा उहाँलाई कारबाही हुनसक्छ ।’
नेता महतोले पछिल्लो समय पार्टीको हित विपरीतका गतिविधि गर्दै आएको भन्दै पार्टीले अध्ययन गरिरहेको महासचिव झाले बताए । महतोले बोलेका विषयमा विश्लेषण भइरहेको पनि उनले बताएका छन् ।
महासचिव झाका अनुसार महतोले पार्टी र पार्टीका अध्यक्ष महन्थ ठाकुरको बारेमा स्तरहीन अभिव्यक्तिहरु दिइरहेकाले पार्टीमा छलफल गरेर उनलाई कारबाही गर्न सकिने बताएका छन् ।
उनले भने, ‘पार्टीमा कुनै विषयमा असहमति छ भने पार्टीभित्रै छलफलको माध्यमबाट समाधान गर्न सकिन्छ तर ती सबै छाडेर पार्टीका आन्तरिक विषयहरुमा उहाँले बाहिर जथाभावी बोल्दै हिँड्नुभएको छ ।’
पार्टीका अध्यक्ष ठाकुरले सार्वजनिक गरेको केन्द्रीय समितिको नामावलीमा नेता महतोलाई चित्त बुझेको छैन । उनले आफ्ना थुप्रै मान्छे छुटेको भन्दै उनीहरुलाई समावेश गर्न माग गरेका छन् ।
अध्यक्ष ठाकुरले पनि विभिन्न छलफल तथा बैठकमा केन्द्रीय समिति विस्तार गर्ने र छुटेका व्यक्तिलाई समावेश गर्ने प्रतिवद्धता जनाएका छन् । तर त्यही प्रतिवद्धता कार्यान्वयन नभएको भन्दै नेता महतो अध्यक्ष ठाकुरप्रति आक्रोशित बनका हुन् ।
पछिल्लो समय पार्टीका नेता एवं मधेसका प्रदेशसभा सदस्य अभिराम शर्मालाई अदालतले जन्मकैदको फैसला सुनाएपछि नेता महतोले सरकारबाट पार्टीलाई फिर्ता गर्न अध्यक्ष ठाकुरसमक्ष आग्रह गरेका थिए ।
तर अध्यक्ष ठाकुरले सरकारलाई दिएको समर्थन यथावत रहने र अभिराम शर्माको बारेमा कानुनी उपचार खोज्ने भन्दै विज्ञप्ति जारी गरेका थिए । त्यसप्रति नेता महतो झन् असन्तुष्ट बनेका छन् । उनी अहिले तराई मधेसमा गएर पार्टी र पार्टीका अध्यक्ष ठाकुरको भण्डाफोरमा लागिरहेका छन् ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया