काठमाडौं । राखी सावन्तका पति आदिल खान दुर्रानीलाई भारतको ओशिवारा प्रहरीले पक्राउ गरेको छ । सोमबार राति राखीले आदिलविरुद्ध विवाहेत्तर सम्बन्ध र ठगीको आरोप लगाउँदै उजुरी दर्ता गरेपछि प्रहरीले मंगलबार आदिललाई राखीको घरबाट पक्राउ गरेको हो ।
आदिलले विवाहको नाममा आफूबाट सबै गहना र पैसा लिएको पनि राखीले प्रहरीलाई बताएकी छन् । प्रहरीमा एफआईआर दर्ता गर्नुअघि मिडियासँग कुरा गर्दै राखीले आदिलले आफूबाट घरको साँचो खोसेको र फिर्ता गर्न नमानेको बताइन् ।
राखीले लामो समयदेखि आदिलले आफूलाई यातना दिइरहेको समेत बताइन् । ‘उनले मलाई बलिउडमा नाम कमाउन प्रयोग गरेका छन् । मसँग भएको सबै पैसा लिएर गए,’ राखीले भनेकी छन् ।
यससँगै आदिलले आफू राखीसँग अलग भइसकेको र प्रेमिकासँग सँगै बस्न थालेको समेत प्रहरीसामु राखीले बताएकी छन् । राखी र आदिलले गत महिना मात्रै अदालती विवाह गरेका थिए ।
२७ वर्षीय आदिल खान दुर्रानी कर्नाटकका बासिन्दा हुन् । उनको कार व्यवसाय छ । मिडिया रिपोर्टका अनुसार आदिल र राखीले मे २०२२ देखि एकअर्कालाई डेट गरिरहेका थिए । यसै क्रममा राखीसँगै आदिलले मुम्बईमा डान्स एकेडेमी पनि खोलेका थिए ।
राखीकी आमाको केही दिनअघि निधन भएको थियो । उनी लामो समयदेखि मुम्बईको टाटा मेमोरियल क्यान्सर अस्पतालमा भर्ना थिइन् । राखीकी आमालाई क्यान्सर र ब्रेन ट्युमर थियो ।
सामाजिक सञ्जालमा आमालाई सम्झिंदै राखीले लेखेकी थिइन्, ‘आज मेरो टाउकोबाट आमाको हात हटेको छ, अब मसँग गुमाउन केही बाँकी छैन ।’
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया