काठमाडौं। प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा त्रिभुवन आर्मी क्लबले उत्कृष्ट प्रदर्शन गर्दै लगातार पाँचौँ जित दर्ता गरेको छ।
सोमबार भैरहवास्थित एक्स्ट्राटेक ओभल क्रिकेट मैदानमा सम्पन्न खेलमा आर्मीले विभागीय प्रतिद्वन्द्वी एपीएफ क्लबलाई ७ विकेटले पराजित गरेको हो।
टस हारेर पहिले ब्याटिङ गरेको एपीएफ क्लब ४२.३ ओभरमा १४१ रनमै अलआउट भयो। जवाफी ब्याटिङमा आर्मीले ४२.५ ओभरमा ७ विकेट गुमाउँदै १४५ रन बनाएर जित निकालेको हो।
खेलको दौरान आर्मी क्लब संकटमा परेको थियो। ८७ रनमै ७ विकेट गुमाइसकेको अवस्थामा कुशल मल्ल र सोमपाल कामीले उत्कृष्ट साझेदारी गर्दै टिमलाई जितसम्म पुर्याए। कुशल मल्लले अविजित ३१ रन बनाए भने सोमपाल कामीले २२ रन जोडे।
यस जितसँगै आर्मी क्लब प्रतियोगितामा अपराजित रहँदै पाँच खेलबाट १० अंकसहित शीर्ष स्थानमा उक्लिएको छ। एपीएफले भने पाँच खेलमा ३ जित र २ हार व्यहोरेको छ।
बलिङतर्फ आर्मीका आकाश चन्दले ४ विकेट लिए भने सोमपाल कामीले ३ विकेट लिएर महत्वपूर्ण योगदान दिए। एपीएफका लागि सन्दीप जोराले सर्वाधिक ६५ रन बनाए।
आर्मीको यो जितले सेमिफाइनल यात्रामा बलियो पकड बनाएको छ भने एपीएफले प्लेअफको सम्भावना जीवित राख्न आगामी खेल जित्नुपर्नेछ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया