काठमाडौँ । सुदूरपश्चिम प्रदेशको बझाङ केन्द्रबिन्दु भएर गएको भूकम्पका कारण ७ जना घाइते भएका छन् ।
बझाङमा ५ जना, बैतडीमा १ जना र अछाममा १ जना घाइते भएको सुदूरपश्चिम प्रदेश प्रहरी कार्यालयका प्रवक्ता (एसएसपी) प्रज्वलन महर्जनले बताएका छन् ।
बझाङमा भूकम्पबाट घाइते भएकाहरू ५ जना बालबालिका हुन् । घाइतेहरूको अवस्था सामान्य रहेको छ भने अछाममा घाइते भएका पनि बिद्यार्थी हुन् उनले अतालिएर स्कुलको माथिल्लो तलाबाट हामफालेर घाइते भएका हुन् । मंगलबार दिउँसो ३ बजेर ६ मिनेटमा भूकम्प गएको हो ।
भूकम्पका कारण ठाउँ-ठाउँमा भवनहरु भत्किएका छन्। तलकोट गाउँपालिका-१ को सुनिकोट माध्यमिक विद्यालय, जयपृथ्वी नगरपालिका-१० को सत्यवादी माध्यमिक विद्यालय, हिमालय माध्यमिक विद्यालयको भवन चर्किएको विवरण प्राप्त भएको छ।
बझाङको चैनपुर केन्द्रबिन्दु भएर गएको ६.३ म्याग्निच्युडको भूकम्पका कारण बझाङमा पहिरो पनि गएको छ ।
भूकम्पसँगै आएको सुक्खा पहिरो जाँदा जयपृथ्वी राजमार्ग अवरुद्ध भएको छ। प्रहरीका अनुसार सडकमाथिबाट पहिरो जाँदा जयपृथ्वी नगरपालिका-७ को कचरी खोलामा राजमार्ग अवरुद्ध भएको छ।
बझाङका प्रमुख जिल्ला अधिकारी नारायण पाण्डेयले पराकम्पन आउने क्रम जारी रहेका कारण सडक खुलाउन नसकिएको बताए ।
पाण्डेयले सडक खुलाउन डोजर लगायतका उपकरण तयारी अवस्थामा राखिएको बताए। उनले जिल्लामा अहिलेसम्म मानवीय क्षति भएको विवरण प्राप्त नभएको बताउँदै सूचना संकलनको काम भइरहेको जानकारी दिए।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया