काठमाडौं । मोरङमा नाबालक दुईजना छोरीलाई विष खुवाएर ज्याल लिएपछि फरार भएकी आमा पक्राउ परेकी छिन्। पक्राउ पर्नेमा मोरङको सुन्दरहरैँचा नगरपालिका-७ मालती टोलकी २१ वर्षीया अस्मिता पौडेल छिन्।
उनलाई प्रहरीले बुधबार बिहान झापाको बिर्तामोड नगरपालिका-५ पूर्वपश्चिम राजमार्गनजिक एभरेष्ट बैंकअगाडिबाट पक्राउ गरेको मोरङका प्रहरी उपरीक्षक नवराज कार्कीले बताए।
पौडेल भदौ १५ गते अपराह्न साढे ४ बजेपछि फरार भएकी थिइन्। त्यही दिन सुन्दरहरैंचा-७ को केरा बगानमा उनका दुई छोरी मृत फेला परेका थिए। एक वर्षीया आइङ्का र तीन वर्षकी छोरी अर्पनालाई विष खुवाएर ज्यान लिएको खुलेको छ । दुवै छोरीलाई मृत अवस्थामा प्रहरीले फेला पारेको थियो।
कार्कीका अनुसार पौडेलले भदौ १४ गते राति नै दुई छोरीलाई विष खुवाए ज्यान लिएको खुलेको छ। निर्माणाधीन घरमा पानी लगाउने विषयमा श्रीमानसँग विवाद भएपछि उनी छोरी लिएर घरबाट हिँडेकी थिइन् ।
पौडेल दम्पतीबीच पटक-पटक घरायसी कुरामा विवाद हुने गरेको प्रहरीले जनाएको छ। पौडेललाई प्रहरीले बुधबार दिउँसो सार्वजनिक गरेको छ।
श्रीमानले नाबालिका छोरीको हत्या गरेको कर्तव्य ज्यानसम्बन्धी कसुरमा श्रीमतीविरूद्ध जाहेरी दिएका छन्। पौडेललाई मोरङ जिल्ला अदालतबाट ४ दिन हिरासतमा राख्ने अनुमति लिएर अनुसन्धान थालिएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया