काठमाडौँ। आइसिसी टी-२० विश्वकप २०२४ अन्तर्गत आफ्नो पहिलो खेलमा खराब ब्याटिङ गर्दा नेपाल पराजित भएको छ। अमेरिकाको टेक्सासको डालासस्थित ग्रान्ड प्रिएरी क्रिकेट रंगशालामा नेपालले नेदरल्यान्ड्ससँग ६ विकेटको हार बेहोर्यो।
नेपालले दिएको १०७ रनको लक्ष्य नेदरल्यान्ड्सले १८.४ ओभरमा ४ विकेटको क्षतिमा पूरा गर्यो। नेदरल्यान्ड्सका लागि ओपनिङ ब्याटर म्याक्स ओ’डाउडले अर्धशतक प्रहार गरे। उनले नटआउट ५४ रन प्रहार गर्ने क्रममा ४८ बलमा ४ चौका र १ छक्का प्रहार गरे।
त्यसअघि अर्का ओपनर माइकल लेभिटलाई सोमपाल कामीले दोस्रो ओभरमा १ रनमै आउट गरेका थिए। त्यसपछि दीपेन्द्रसिंह ऐरीले विक्रमजित सिंहलाई नवौं ओभरमा २२ रनमा एलबिडब्लूको धरापमा पारेका थिए। साइब्रड एन्गेलब्रेचलाई सोमपाल कामीले १४ रनमा आउट रनआउट गर्दा अभिनास बोहराले कप्तान स्कट इडवार्डलाई ५ रनमा बोल्ड गरे।
खेलमा नेपालका कप्तान रोहित पौडेलले १८औं ओभरमा ओ’डाउडको क्याच मिस गरेका थिए। त्यतिबेला उनी ४१ रन बनाएर खेलिरहेका थिए। बलिङमा नेपालका सोमपाल कामी, दीपेन्द्रसिंह ऐरी र अभिनास बोहराले १-१ विकेट लिए।
अमेरिकाको डालासस्थित ग्रान्ड प्रिएरी क्रिकेट रंगशालामा नेदरल्यान्ड्सले टस जितेर फिल्डिङ रोजेपछि पहिले ब्याटिङ गरेको नेपाल ४ बल खेल्न बाँकी छदा १०६ रनमै अलआउट भयो। ग्रान्ड प्रिएरी मैदानमा नेपाली समर्थकको भरपुर साथ पाए पनि ब्याटिङमा भने सोचे जस्तो प्रदर्शन हुन सकेन।
१५ हजार दर्शक क्षमताको रंगशालामा ६ हजार ८ सय दर्शकको उपस्थिति भएको आइसिसीले आधिकारिक तथ्यांक उपलब्ध गराएको थियो। जहाँ अधिकांस दर्शक नेपाली थिए। लगातार विकेट गुमाएको नेपालका लागि रोहित पौडेलले ३५ रन जोडे। १६औं ओभरमा सातौं विकेटको रूपमा पेभिलियन फर्कनुअघि रोहितले ३७ बलमा ५ चौका प्रहार गरे।
नेपाली ब्याटर विरूद्ध नेदरल्यान्ड्सका स्पिनर टिम प्रिङगनल हाबी भए। उनले कप्तान रोहितसहित कुशल भुर्तेल र अनिल साहलाई आफ्नो सिकार बनाएका थिए। उनले चार ओभरमा २० रन खर्चिदा ३ विकेट लिए।
नेपालले दोस्रो ओभरदेखि नै विकेट गुमाउन थालेको थियो। ओपनर आसिफ शेख दोस्रो ओभरको अन्तिम बलमा प्रिङगनलको बलमा ७ रनमा क्याच भए। चौथो ओभरको पहिलो बलमा कुशल भुर्तेल ७ रन बनाएर खेलिरहदा भान वीकको एलबिडब्लूको धरापमा परे।
यस्तै तेस्रो नम्बरमा ब्याटिङमा आएका अनिल साह पनि चल्न सकेनन्। उनी आठौं ओभरमा ११ रन जोडेर प्रिङगनलकै बलमा क्याच हुन पुग्दा नेपालले आठौं ओभरमा ४० रन जोड्दा ३ विकेट गुमाएको थियो। दशौं ओभरमा नेपालले चौथो विकेट गुमायो। कुशल मल्ललाई ९ रनमा भान मकेरेनले म्याक्स ओ’डाउडको हातबाट क्याच गराए। लगत्तैको ओभरमा दीपेन्द्रसिंह ऐरी १ रनमा बास डी लीडको बलमा भान वीकबाट क्याच भए।
कप्तान रोहित आउट हुनुअघि सोमपाल कामी शून्यमा मकेरेनबाट बोल्ड भएका थिए। १९औं ओभरमा डी लिडको बलमा क्याच भएका करण केसीले १२ बलमा ६ छक्काको मद्दतमा १७ रन जोड्दा नेपाललाई केही राहत मिलेको थियो।अन्तिम ओभरको पहिलो बलमा गुल्सन झा १४ रनमा भान वीकबाट बोल्ड भए। उनले १५ बलमा १ छक्का प्रहार गरे। लगत्तैको बलमा अभिनास बोहरा क्याच भए।
बलिङमा नेदरल्यान्ड्सका प्रिङगनल र भान वीकले पनि ३-३ विकेट हात पारे। डी लिड र मकेरेनले २-२ विकेट लिन सफल भए। अब नेपालले दोस्रो खेल जुन ११ मा श्रीलंकासँग फ्लोरिडामा खेल्नेछ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया