काठमाडौं । प्रमुख प्रतिपक्षी नेपाली कांग्रेसले उपप्रधान तथा गृहमन्त्री रवि लामिछाने आरोपित सहकारी ठगी प्रकरणमा महान्यायाधिवक्ता झुकेर लम्पसार परेका बताएका छन् ।
सदनको बजेट अधिवेशनको पहिलो दिन डाकिएको प्रतिनिधि सभा बैठकमा कांग्रेस महामन्त्री गगन थापाले महान्यायाधिवक्ता डा. दिनमणि पोख्रेल झुक्दा झुक्दा लम्पसारै परेका आरोप लगाएका हुन् ।
महान्यायाधिवक्ता कार्यालयले केही दिनअघि सत्तारुढ राष्ट्रिय स्वतन्त्र पार्टी (रास्वपा) सभापति लामिछानेमाथि सहकारी ठगीमा कुनै उजुरी नपरेको दाबी गर्दै ‘क्लिनचिट’ दिएको थियो ।
संसदमा बोल्दै कांग्रेस महामन्त्री थापाले भने, ‘माननीय गृहमन्त्रीले केही दिनअघि सदनको बाहिरपट्टिको भर्याङमा उभिएर संसद् ४ वर्ष बन्द भए पनि हुन्छ, मजाले चलाउने हो भन्नुभएको थियो । भर्खर भर्खर आउनुभएको, धेरै कुरा थाहा भएन कि भन्ने लागेको । तर प्रधानमन्त्री त धेरैपटक प्रधानमन्त्री हुनुभएको, पटक-पटक सदनमा आउनुभएको, सदन कसरी चल्छ, चलाउनुपर्छ भन्ने पक्कै पनि बुझ्नुभएको होला भन्ने लागेको थियो । तर, हिसाबकिताब बिग्रने डर त सबैतिर हुने नै भयो । आज सदनमा जुन दृश्य बन्न जाँदैछ, यसको कारण हामी होइनौं । कारक पनि हामी होइनौं । जे गर्ने सोच राखिएको छ, त्यसको ठूलो मूल्य सबैले चुकाउनुपर्छ ।’
महामन्त्री थापाले प्रश्न गरे, ‘समिति बनाएर छानविन गरिदिए आहा कति आनन्द हुन्थ्यो । सबैले थाहा पाउँथे । किन डराएको ? किन भागेको ? कहिले प्रहरीलाई बोल्न लगाएको छ, कहिले प्रधानमन्त्रीलाई बोल्न लगाएको छ । हुँदाहुँदा कानूनले भन्छ : महान्यायाधिवक्ताले कुनै प्रभावमा पर्नु हुँदैन, यहाँ त प्रभाव होइन । झुकाव राख्न हुँदैन भन्छ, झुकाव होइन ।, महान्यायाधिवक्ता त झुक्दा झुक्दा लम्पसारै परिसक्नुभयो । किन डराएको ? किन आत्तिएको ?’
प्रतिक्रिया