काठमाडौँ। आइतबार आफ्नो ट्वीटर अकाउन्ट लगइन गर्दै गर्दा विश्वको राजनीति, मनोरञ्जन तथा खेल क्षेत्र सम्बद्ध धेरै सेलिब्रेटीहरू अचम्ममा परे ।
किनकि शुल्क नतिरेको भन्दै एलन मस्कले हटाइदिएको आफ्नो ट्वीटर अकाउन्टको लोकप्रिय नि:शुल्क निलो टिको पुनः फर्काइएको थियो ।
१० लाख वा सोभन्दा धेरै फलोअर्स हुनेको ट्वीटर भेरिफिकेसन ब्याज फिर्ता गर्ने ट्वीटरको निर्णयसँगै धेरै चर्चित सेलिब्रेटीको हराएको निलो चिह्न शुल्क नतिरिकनै फिर्ता दिइएको छ ।
भारतमा चर्चित क्रिकेटर सचिन तेन्दुलकरदेखि अभिनेताहरु अमिताभ बच्चन, शाहरुख खानलगायतको ट्वीटर अकाउन्टको लिगेसी भेरिफिकेसन ब्याज फिर्ता आएको छ ।
यतिमात्र होइन मृत्यु भैसकेका बास्केटबल खेलाडी कोबो ब्राएन्ट तथा चाडविक बोसम्यान जस्ता दिवंगत सेलिब्रेटीहरुले पनि उनीहरुको ट्वीटर अकाउन्टबाट हटाइएको निलो चिह्न फिर्ता पाएका छन् ।
तर ६५ लाख फलोअर्स भएका ट्वीटर संस्थापक ज्याक डोर्सीको ट्वीटर अकाउन्टबाट हटेको निलो टिको चाहिँ फिर्ता गरिएको छैन ।
ट्वीटरले मासिक शुल्क नतिर्ने प्रयोगकर्ताहरुको अकाउन्ट भेरिफिकेसन ब्याज हटाउने निर्णय अनुसार बिहीबारदेखि विश्वका धेरै देशमा सरकारी निकायहरु, सेलिब्रेटी, व्यापारी तथा नेता आदिको ट्वीटर अकाउन्टमा रहेको नि:शुल्क निलो टिको हटाइदिएको थियो ।
ट्वीटरले अकाउन्ट भेरिफिकेसनका लागि मासिक शुल्क तिर्नुपर्ने नियम ल्याएसँगै त्यसको आलोचना भएको थियो । अमेरिकाका कतिपय चर्चित सेलिब्रेटीहरुले ट्वीटर भेरिफिकेसन सब्सक्रिप्सनको शुल्न नतिर्ने बताएपछि एलन मस्क आफैंले उनीहरुको शुल्क तिरिदिने बताएका थिए ।एजेन्सी
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया