काठमाडौं । नेपाली कांग्रेसका पूर्वसभापति एवम् पूर्वप्रधानमन्त्री शेरबहादुर देउवाले शक्ति प्राप्त गर्न नभई राष्ट्रिय एकता सुदृढ गर्न स्वदेश फर्किएको बताएका छन् ।
करिब पाँच महिना लामो स्वास्थ्योपचारपछि बिहीबार काठमाडौँ ओर्लिएका देउवाले एक वक्तव्य जारी गर्दै विगतका विभाजन र विद्वेषका घाउ निको पार्दै प्रतिशोधको सट्टा मेलमिलापको बाटो रोज्नुपर्नेमा जोड दिएका छन्।
देउवाले नेपाली कांग्रेसले युवा पुस्ताले माग गरेको परिवर्तनलाई आत्मसात् गरेको बताएका छन्। गत भदौमा भएको जेन-जी आन्दोलनका जायज माग सम्बोधन गर्नुपर्ने धारणा आफूले त्यतिबेलै राखेको उल्लेख गर्दै उनले परिवर्तनको अर्थ विगतका संघर्ष, त्याग र बलिदानलाई गलत ठहर्याउनु नभएको स्पष्ट पारे।
‘परिवर्तनको अर्थ विगत खराब थियो, हाम्रा पुस्ताको त्याग, बलिदान र संघर्ष खराब थियो भन्ने होइन,’ देउवाले भनेका छन्।
उनले वर्तमान सरकारको दायित्व जनतामा देखिएको परिवर्तनको आकांक्षा सम्बोधन गर्नु रहेको बताए। ताजा जनमतबाट बनेको सरकारले जनताको मतको कदर गर्न नसके लोकतन्त्रमा जनताभन्दा माथि कोही हुन नसक्ने उनको भनाइ छ। कांग्रेस परिवर्तन व्यवस्थापनको प्रक्रियामा सहयोग गर्न तयार रहेको पनि उनले बताएका छन्।
देउवाले नेपाली कांग्रेसभित्र देखिएको असहमति र निराशा तत्काल समाधान गर्नुपर्नेमा जोड दिएका छन्। संसद्को अंकगणितमा कांग्रेस सानो वा ठूलो भए पनि २००७ सालदेखि भएका राजनीतिक परिवर्तनको नेतृत्व कांग्रेसले गर्दै आएको उनको दाबी छ।
‘नेपाली कांग्रेस कसैको इगोमा होइन, जनताको सर्वोपरि हितलाई केन्द्रमा राखेर अघि बढ्नुपर्छ,’ उनले भनेका छन्। युवा पुस्तालाई अघि बढाउनुपर्ने तर पाका र अनुभवी पुस्तालाई नै खराब देखाउने भाष्य स्वीकार्य नहुने देउवाले बताएका छन्। आफ्नो लामो राजनीतिक अनुभव नयाँ पुस्तासँग बाँड्नु आफ्नो दायित्व भएको उनले बताएका छन्।
उनले संविधान नेपालीको लामो संघर्ष र बलिदानबाट प्राप्त भएको उल्लेख गर्दै यसको संरक्षण र आवश्यक संशोधन राष्ट्रिय सहमतिका आधारमा हुनुपर्ने बताएका छन्। कांग्रेस एकताबद्ध भएर अन्य राजनीतिक दलसँग सहमति र सहकार्य गर्दै राष्ट्रियता तथा लोकतन्त्र सुदृढ गर्नुपर्नेमा पनि उनले जोड दिएका छन्।
देउवाले आफूले जीवनभर राष्ट्र, लोकतन्त्र, नागरिक, संविधान र कानुनलाई सर्वोपरि मानेर काम गरेको दाबी गर्दै कानुन र नीतिविपरीत कुनै काम नगरेको बताएका छन्।
‘मेरो जीवन खुला किताब हो,’ उनले भनेका छन्, ‘अझ पनि जीवन रहँदासम्म राष्ट्र, राष्ट्रियता, लोकतन्त्र, मुलुक र जनताको सर्वोत्तम हित, संविधान, कानुन र नैतिकता तथा मूल्य–मान्यताअनुसार काम गर्नेछु।’
देउवाले आफू नेता बनेर नभई ‘यस महान राष्ट्रको आजीवन नागरिक’ बनेर विनम्रता, समर्पण र प्रेमका साथ सेवा गर्न फर्किएको बताएका छन्।
उनले २०३३ सालमा बीपी कोइराला भारत निर्वासनबाट नेपाल फर्किँदा राष्ट्रवादी र प्रजातन्त्रवादी शक्तिहरू एक हुनुपर्ने उद्घोष गरेको स्मरण गर्दै अहिले पनि सर्वपक्षीय राष्ट्रिय एकताको आवश्यकता रहेको बताएका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया