इरान । पश्चिम एसियाको आकाशमा एक असाधारण सैन्य घटना सार्वजनिक भएको छ। अमेरिकी सञ्चारसंस्था CNN का अनुसार विश्वकै अत्याधुनिक पाँचौँ पुस्ताका ‘स्टेल्थ’ लडाकु विमान F-35 Lightning II माथि आक्रमण भएपछि ती विमानहरूलाई आपत्कालीन रूपमा क्षेत्रीय सैन्य अड्डामा अवतरण गराइएको छ।
घटनाले केवल सामान्य सैन्य क्षतिमा सीमित नरही हवाई युद्धमा पश्चिमी प्रभुत्वमाथि नै गम्भीर प्रश्न उठाएको विश्लेषण गरिएको छ। F-35 Lightning II जस्ता ‘अजेय’ मानिएका विमानमाथि आक्रमण हुनु हाल जारी द्वन्द्वकै सबैभन्दा चिन्ताजनक संकेतका रूपमा हेरिएको छ।
रिपोर्टअनुसार उक्त आक्रमण इरान बाट भएको हुनसक्ने आशंका गरिएको छ। अमेरिकी सेनाको United States Central Command (सेंटकम) का प्रवक्ता क्याप्टेन Tim Hawkins ले ती स्टेल्थ जेटहरू आपत्कालीन अवतरणअघि “इरानको आकाशमा सक्रिय युद्ध अभियान”मा संलग्न रहेको बताएका छन्।
उनका अनुसार सबै विमानहरू सुरक्षित रूपमा अवतरण गराइएको छ भने चालक दलको अवस्था पनि स्थिर रहेको छ। घटनाको विस्तृत अनुसन्धान सुरु भइसकेको जनाइएको छ।
गत फेब्रुअरीदेखि जारी द्वन्द्वका क्रममा F-35 Lightning II माथि प्रत्यक्ष आक्रमण भएको यो पहिलो घटना मानिएको छ। अमेरिका र इजरायल दुवैले प्रयोग गर्दै आएका यी अत्याधुनिक विमानहरूको मूल्य प्रति जहाज १० करोड अमेरिकी डलरभन्दा बढी पर्छ। लामो समयदेखि यी विमानहरूलाई ‘अजेय’ मानिँदै आएको थियो।
तर पछिल्ला घटनाक्रमले उक्त धारणा कमजोर बन्दै गएको संकेत गरेका छन्। यसअघि पनि अमेरिकाले केही लडाकु विमान गुमाए तापनि ती प्रत्यक्ष शत्रु आक्रमणबाट नष्ट भएका थिएनन्। केही समयअघि कुवेत को हवाई सुरक्षाद्वारा भुलवश गरिएको आक्रमणमा F-15 Eagle खसालिएको थियो, जसका चालक दललाई सकुशल उद्धार गरिएको थियो।
यसैबीच, गत हप्ता पश्चिमी इराक मा KC-135 Stratotanker इन्धनवाहक विमान दुर्घटनाग्रस्त भएको थियो। अमेरिकी सेनाले उक्त घटनामा कुनै शत्रु संलग्नता नरहेको जनाएको भए पनि दुर्घटनामा सवार सबै ६ जना चालक दल सदस्यको मृत्यु भएको थियो।
F-35 Lightning II जस्तो अत्याधुनिक स्टेल्थ विमानमाथि भएको यो आक्रमणले आधुनिक युद्धको स्वरूप परिवर्तन हुँदै गएको संकेत दिएको विश्लेषकहरूको भनाइ छ। यसलाई केवल एक घटना मात्र नभई पश्चिमी हवाई प्रभुत्वको आधार हल्लाउने सम्भावित मोडका रूपमा हेरिएको छ। विश्वभरका सञ्चारमाध्यमहरूले यस घटनालाई प्रमुखताका साथ प्रकाशन गरेका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया