काठमाडौं, चैत २१ — विद्यालय शिक्षा ऐन ल्याउन माग गर्दै आन्दोलनमा उत्रिएका शिक्षकहरूसँग शुक्रबार तय भएको वार्ता हुन् नसकेपछि सरकारले फेरि संवादका लागि आह्वान गरेको छ।
शुक्रबार दिउँसो ३ बजे कार्यवाहक प्रधानमन्त्री प्रकाशमान सिंहको उपस्थितिमा सिंहदरबारमा तय भएको वार्तामा शिक्षक महासंघका प्रतिनिधिहरू अनुपस्थित रहे। डेढ घण्टासम्म पर्खिएपछि वार्ता स्थगन गरिएको शिक्षा, विज्ञान तथा प्रविधिमन्त्री विद्या भट्टराईले जानकारी दिइन्।
“सरकार गम्भीर छ, वार्ताका लागि लचिलो रूपमा प्रस्तुत भएको थियो,” मन्त्री भट्टराईले भनिन्, “तर शिक्षक प्रतिनिधिहरू नआएपछि हामी फेरि संवादका लागि आह्वान गर्ने निष्कर्षमा पुगेका छौं।”
सरकारले बिहीबार साँझ पनि शिक्षकहरूसँग वार्ता गरेको थियो तर सहमति नजुटेपछि आज पुनः बैठक बोलाइएको थियो। तर शिक्षक पक्षको अनुपस्थितिले सरकार–शिक्षकबीचको सम्वाद प्रक्रिया प्रभावित भएको छ।
विद्यालय शिक्षा ऐनको शीघ्र कार्यान्वयनको माग राख्दै शिक्षकहरूले केही दिनदेखि आन्दोलन गर्दै आएका छन्। सरकारले भने शिक्षकका मागप्रति सकारात्मक र संवेदनशील रहेको बताउँदै आएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया