News Portal

  • आज :

ताजा शिर्षकहरु

चर्चित शिर्षकहरु

विशेष

महाकालीमा एसएसबीको अनधिकृत र्‍याफ्टिङ

0.9K
SHARES


कञ्चनपुर। भारतीय सीमा सुरक्षा बल (एसएसबी) ले नेपाली प्रशासनलाई जानकारीसमेत नदिई महाकाली नदीमा विपद् प्रतिकार्य र खोज उद्धार अभ्यासका नाममा महाकाली नदीमा र्‍याप्टिङ गरिरहेको छ ।

अन्तर्राष्ट्रिय कानुनविपरीत एसएसबीले दार्चुलाको जौलजिवीदेखि र्‍याफ्टिङ गरिरहेको हो । बिहीबार सुरु भएको र्‍याफ्टिङ आइतबार कञ्चनपुरको सीमावर्ती क्षेत्र टनकपुरमा पुगेर समापन हुने जनाइएको छ ।

भारत उत्तराखण्ड राज्यको पिथौरागढ र धार्चुला क्षेत्रका एसएसबीको टोलीले सैन्य गतिविधिकै झल्को दिने गरी महाकालीमा र्‍याफ्टिङ गरिरहेका हुन् ।

उक्त टोलीमा कति जना छन् भन्नेसम्म पनि नेपाली प्रशासनलाई जानकारी छैन । ‘हामीलाई यसबारे कुनै जानकारी वा समन्वय गरिएको छैन,’ दार्चुलाका प्रमुख जिल्ला अधिकारी दीर्घराज उपाध्यायले भने, ‘यस विषयमा पिथौरागढका डीएम (डिस्ट्रिक्ट मेजिस्ट्रेट) रिना जोशीलाई शुक्रबार पत्राचार पनि गरेका छौं ।’ सीमा नदी भएकाले समन्वय गर्नुपर्नेमा अबदेखि यस्तो नगर्नसमेत पत्रमा उल्लेख गरिएको उनले बताए ।

बैतडीका प्रमुख जिल्ला अधिकारी सुरेश पन्थीले पनि सीमाक्षेत्रका सुरक्षा निकायका प्रमुखको नियमित बैठकमा एसएसबीले महाकाली नदीमा गरिरहेको र्‍याफ्टिङका विषयमा आफूहरूले आपत्ती जनाएको बताए ।

‘जानकारीबिना गतिविधि भइरहेकाले अबदेखि पूर्वजानकारी वा समन्वय गरेर मात्रै यस्ता गतिविधि गर्न सचेत गरेका छौं,’ प्रजिअ पन्थीले भने, ‘एसएसबी र पिथौरागढका डीएमले पनि कमजोरी भएको स्विकार्दै अबदेखि समन्वय गर्ने बताएका छन् ।’

विपद् प्रतिकार्य वा उद्धारसम्बन्धी अभ्यास जेसुकै भए पनि सीमाक्षेत्रमा हुने गतिविधिका बारेमा आपसी समन्वय हुनुपर्ने प्रजिअ पन्थीले बताए । जिल्ला प्रशासन दार्चुलाले पत्राचार गरिसकेकाले बैतडीले पत्राचार नगरेको उनले बताए । उनका अनुसार पिथौरागढ र धार्चुला क्षेत्रका ४१ जनाको एसएसबी टोलीले महाकालीमा र्‍याफ्टिङ गरिरहेको छ ।

आइतबार टनकपुरमा अभ्यासको समापनमा सहभागिताका लागि एसएसबीले कञ्चनपुरका प्रमुख जिल्ला अधिकारीलाई निम्तो नै पठाएको छ । र्‍याफ्टिङका विषयमा भने कुनै समन्वय नभएको जिल्ला प्रशासन कार्यालयले जनाएको छ ।

कञ्चनपुरको उत्तरी क्षेत्र खल्ला मसेट्टीमा र्‍याफ्टिङ गर्दा एसएसबीले अवरोध गर्थ्यो । सीमा नदी भएकाले माथिल्लो स्तरबाट सहमति भएपछि मात्रै र्‍याफ्टिङ गर्न सकिने एसएसबीले पनि बताउँदै आएका थिए ।

सञ्चारकेन्द्र
emailsanchar@gmail.com

नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।

सञ्चारकेन्द्रबाट थप +



प्रतिक्रिया