काठमाडौं । ओखलढुङ्गा बाट सानो उमेरमै कामको खोजीमा राजधानी काठमाडौं आएका एक युवाको संघर्ष अहिले धेरैका लागि प्रेरणाको कथा बनेको छ। आर्थिक अभावका कारण पढाइ बीचमै छाड्न बाध्य भएका ती युवक आज आफ्नो मेहनत, सीप र लगनशीलताका कारण मासु काट्ने काममा दक्ष मात्र बनेका छैनन्, सामाजिक सञ्जाल टिकटकमा समेत लाखौं दर्शकमाझ भाइरल भइरहेका छन्।
घरको कमजोर आर्थिक अवस्थाले गर्दा उनले सानै उमेरमा गाउँ छाडेर काठमाडौंको बाटो समातेका थिए। नयाँ ठाउँ, अपरिचित वातावरण र कुनै अनुभवबिनाको कठिन यात्राबाट उनले आफ्नो संघर्ष सुरु गरे। सुरुका दिनहरू निकै चुनौतीपूर्ण थिए। मासु काट्ने कामबारे कुनै ज्ञान नभएका उनले महिनाको केवल पाँच हजार रुपैयाँ तलबबाट काम सुरु गरेका थिए।
“सुरुमा काम निकै गाह्रो थियो। नजानेको काम, नयाँ ठाउँ र धेरै दुःख थियो। तलब पनि निकै कम थियो,” उनी भन्छन्, “तर मैले कहिल्यै काम छाडिनँ। धैर्य, लगनशीलता र इमान्दारिताका साथ निरन्तर लागिरहेँ। मलाई विश्वास थियो-मेहनत गरिरहियो भने एकदिन राम्रो परिणाम अवश्य आउँछ।”
लगातार १०-११ वर्षसम्म यही क्षेत्रमा संघर्ष गर्दै उनले आफूलाई दक्ष कामदारका रूपमा स्थापित गरेका छन्। अहिले उनी मासु काट्ने कामबाट मासिक ४० देखि ४५ हजार रुपैयाँसम्म आम्दानी गरिरहेका छन्। बिहान ३ बजेदेखि उठेर राति ९-१० बजेसम्म काममा खटिने उनको दिनचर्या अझै उस्तै मेहनती छ।
कडा परिश्रमको बीचमा उनले सामाजिक सञ्जाललाई आफ्नो अभिव्यक्तिको माध्यम पनि बनाएका छन्। फुर्सदको समयमा उनी टिकटकमा मासु जोख्ने, कटिंङ्ग स्किल देखाउने तथा ग्राहकहरूको चाहनाअनुसार भिडियो बनाउने गर्छन्। उनका धेरै भिडियो लाखौं पटक हेरिएका छन् भने केही भिडियोमा ३ मिलियनदेखि ९ मिलियनभन्दा बढी भ्युज पुगेका छन्।
“दिनभरिको थकान र दुःख टिकटकमा भिडियो बनाउँदा केही समयका लागि भुल्न सक्छु,” उनी भन्छन्, “साथीहरूको माया र सपोर्टले अझ काम गर्न हौसला मिल्छ।” उनको सपना भने गायक बन्ने थियो। तर पारिवारिक र आर्थिक समस्याका कारण त्यो सपना पूरा हुन सकेन। त्यसपछि उनले जीवनलाई संघर्षसँगै अघि बढाउने निर्णय गरे। आज उनी आफ्नो मेहनतबाट प्राप्त कमाइ र सम्मानप्रति सन्तुष्ट देखिन्छन्।
विदेश जाने सोचभन्दा नेपालमै बसेर आफ्नै सीप र मेहनतबाट केही गर्ने उनको अठोट अझै बलियो छ। “पढाइ धेरै नभए पनि मेहनत र सीप भए नेपालमै पनि सम्मानजनक कमाइ गर्न सकिन्छ,” उनी आत्मविश्वासका साथ भन्छन्।
यो कथा केवल एक युवाको व्यक्तिगत संघर्षको कथा मात्र होइन। यो निरन्तरता, धैर्यता, लगनशीलता र इमान्दारिताको जीवित उदाहरण पनि हो। कुनै पनि काम सानो नहुने, मेहनत र निरन्तरताले मानिसलाई सफल बनाउने तथा विदेश नगई आफ्नै देशमै सीप र परिश्रमबाट सम्मानजनक जीवन बिताउन सकिने सन्देश यो कथाले स्पष्ट रूपमा दिन्छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया