काठमाडौं । नेपाली कांग्रेसको केन्द्रीय सदस्य दिनेश कोइरालाले नियमित वा विशेष महाधिवेशनको विवादको जरा सभापति शेरबहादुर देउवा भएको बताएका छन् ।
सभापति देउवाले पद आशक्ति नदेखाए पार्टीभित्रको विग्रह समाप्त हुने कोइरालाले देउवालाई पत्र लेखेर बताएका छन् ।
‘नेतृत्व हस्तान्तरण गर्नुहोस्, शक्ति र आशक्तिको काम नगर्नुहोस् । आफू एक कदम पछि हटेर पार्टी एकतालाई दुई कदम अगाडि बढाउनुहोस् । नेतृत्व हस्तान्तरण गर्नुभयो भने अहिले पार्टीमा देखिएको विग्रह साम्य हुनेछ र नेपाली कांग्रेसले सानदार रूपमा आमचुनावको सामना गर्न सक्नेछ,’ कोइरालाले लेखेको पत्रमा भनिएको छ, ‘विशेष महाधिवेशन कि नियमित महाधिवेशन भन्ने विवादको जरा तपाईं नै हो । तपाईंले मार्गप्रशस्त गरिदिने हो भने विशेष र नियमित महाधिवेशनको विवाद चुट्कीको भरमा समाधान हुनसक्छ ।’
आफूलाई घेरा लगाएर बस्ने र उकेरा लगाउनेको स्वार्थबाट बाहिर निस्कन सभापति देउवालाई उनले आग्रह गरेका छन् । सभापति देउवालाई घेरा हाल्नेहरू समयको प्रवाहलाई रोक्न खोजिरहेको कोइरालाको टिप्पणी छ ।
कार्यवाहक सभापति पूर्णबहादुर खड्कालाई दिँदा वाहवाही र सम्मान पाएका देउवालाई स्वार्थी समूहले परिबन्दमा पारेको कोइरालाले उल्लेख गरेका छन् ।
देउवालाई पत्रमा कोइराला भन्छन्, ‘तर, तपाईंको पुनरागमनसँगै तपाईंलाई घेरा र उकेरा लगाउनेहरुले यस्तो परिवन्द सिर्जना गरेका छन्, नेपाली कांग्रेस झन् ठूलो संकटमा फसेको छ । घेरा र उकेरा लगाउनेहरुले आफ्नो स्वार्थका लागि तपाईंमा लोभ जगाइदिँदै छन्, आफ्नो स्वार्थका लागि तपाईंलाई सत्ताको मैदानमा भिड्न पठाउँदैछन् ।’
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया