काठमाडौं । राष्ट्रिय स्वतन्त्र पार्टी (रास्वपा)ले १३ चैतमा वरिष्ठ नेता बालेन शाह को नेतृत्वमा सरकार गठन गर्ने तयारी तीव्र पारेको छ ।
२१ फागुनमा सम्पन्न प्रतिनिधिसभा निर्वाचनको अन्तिम परिणाम सार्वजनिक भएसँगै रास्वपाले सरकार गठनका लागि आवश्यक समन्वय पूरा गरेको जनाएको छ ।
पार्टीका महामन्त्री कविन्द्र बुर्लाकोटीका अनुसार राष्ट्रपति कार्यालय, प्रधानमन्त्री कार्यालय, संसद् सचिवालय तथा निर्वाचन आयोगसँग आवश्यक समन्वय भइसकेको छ ।
‘१३ गते प्रधानमन्त्रीको शपथ हुन्छ,’ उनले भने । त्यसअघि १२ चैतमा नवनिर्वाचित सांसदहरूको शपथ गराइनेछ । त्यसपछि संसदीय दलको नेता चयन गरी सोही आधारमा बालेन शाहलाई प्रधानमन्त्री नियुक्त गर्ने तयारी गरिएको छ ।
संविधानको धारा ७६ (१) अनुसार राष्ट्रपतिले प्रतिनिधिसभामा बहुमत प्राप्त संसदीय दलका नेतालाई प्रधानमन्त्री नियुक्त गर्ने व्यवस्था छ । सोही संवैधानिक प्रावधानअनुसार प्रक्रिया अघि बढाइएको रास्वपाले जनाएको छ ।
रास्वपाले प्रत्यक्ष र समानुपातिकतर्फ गरी कुल १८२ सिट जित्दै झण्डै दुई तिहाइ बहुमत हासिल गरेको छ । निर्वाचनअघि नै बालेन शाहलाई प्रधानमन्त्रीका रूपमा अघि सारिएको थियो ।
प्रधानमन्त्रीको शपथलगत्तै मन्त्रिपरिषद् गठन गर्ने तयारी पनि गरिएको छ । १५ देखि १८ वटा मन्त्रालय राख्ने योजना अनुसार विज्ञता र क्षमताका आधारमा मन्त्री चयन गरिने बताइएको छ । मन्त्रीहरूको नाम भने १२ चैत साँझसम्म टुंगो लगाइने जनाइएको छ ।
पार्टी सभापति रवि लामिछाने, वरिष्ठ नेता शाह, उपसभापति डिपी अर्याल र नेता स्वर्णिम वाग्ले बीच यसबारे छलफल भइसकेको छ ।
यसैबीच, पार्टीका केही शीर्ष नेताहरू सरकारमा सहभागी नहुने भएका छन् । पार्टी सञ्चालनलाई सुदृढ बनाउन उनीहरूलाई ‘रिजर्भ’ मा राख्ने रणनीति अपनाइएको छ ।
‘पार्टी सञ्चालनका लागि पनि सक्षम टिम आवश्यक हुन्छ, त्यसैले केही शीर्ष नेता सरकारमा नजाने समझदारी भएको छ,’ बुर्लाकोटीले बताए । रास्वपाले जनअपेक्षा अनुसार प्रभावकारी र परिणाममुखी सरकार सञ्चालन गर्ने दाबी गरेको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया