वासिङ्टन डिसी । अमेरिकी राष्ट्रिय गुप्तचर निर्देशनालयकी निर्देशक तुलसी गब्बार्डले इरानले आफ्नो आणविक संवर्द्धन क्षमता पुनर्निर्माण नगरेको खुलासा गरेकी छिन्।
बुधबार अमेरिकी सिनेटको गुप्तचर समितिलाई बुझाइएको लिखित प्रतिवेदनमा गब्बार्डले गत वर्ष अमेरिका र इजरायलले गरेको आक्रमणपछि इरानको आणविक कार्यक्रम पूर्ण रूपमा ध्वस्त भएको र त्यसलाई ब्युँताउने कुनै प्रयास नभएको उल्लेख गरेकी छिन्।
यो खुलासाले राष्ट्रपति डोनाल्ड ट्रम्पले इरानविरुद्ध युद्ध छेड्नका लागि अघि सारेको प्रमुख तर्कलाई नै कमजोर बनाइदिएको छ। राष्ट्रपति ट्रम्प र उनका उच्च अधिकारीहरूले इरानको आणविक महत्वाकांक्षालाई विश्वका लागि ठूलो खतरा भन्दै कूटनीतिक वार्ता भंग गरेर सैन्य कारबाहीको बाटो रोजेका थिए।
सन् २०२५ जुनमा सञ्चालन गरिएको अपरेशन मिडनाइट ह्यामरमार्फत इरानी आणविक केन्द्रहरूमा आक्रमण गरिएको थियो। गब्बार्डको लिखित बयान अनुसार उक्त सैन्य अपरेसनले इरानको आणविक संवर्द्धन कार्यक्रमलाई ‘जरादेखि नै उखेलेको’ थियो र त्यसयता इरानले यसलाई पुनः सुरु गर्ने कुनै संकेत देखाएको छैन।
रोचक पक्ष के छ भने, टेलिभिजनबाट प्रत्यक्ष प्रसारण गरिएको सार्वजनिक सुनुवाइका क्रममा गब्बार्डले आफ्नो लिखित प्रतिवेदनको यो महत्त्वपूर्ण अंश वाचन गरिनन्। पछि सांसदहरूले यस विषयमा प्रश्न उठाउँदा उनले समयको अभावका कारण उक्त भाग छुटाएको तर्क गरिन्।
यद्यपि, उनले लिखित प्रतिवेदनमा उल्लेख गरिएको तथ्यलाई अस्वीकार भने गरिनन्। यसै सन्दर्भमा डेमोक्र्याटिक सिनेटर मार्क वार्नरले गब्बार्डमाथि राष्ट्रपतिको दाबीलाई काट्ने तथ्यहरू नियोजित रूपमा लुकाउन खोजेको आरोप लगाएका छन्।
ट्रम्पले एकातर्फ सन् २०२५ को आक्रमणले इरानको आणविक क्षमता समाप्त पारेको दाबी गर्दै आएका छन् भने अर्कोतर्फ इरानको कथित आणविक महत्त्वाकांक्षा अमेरिकाका लागि तत्कालको खतरा रहेको भन्दै युद्धको औचित्य पुष्टि गर्ने प्रयास गरिरहेका छन्।
इरानले भने वर्षौँदेखि आफू आणविक हतियार बनाउने दौडमा नरहेको स्पष्ट पार्दै आएको छ। अन्तर्राष्ट्रिय आणविक र हतियार अनुगमनकर्ताहरूले पनि इरानको आणविक कार्यक्रमले तत्काल वा मध्यम अवधिको लागि कुनै ठूलो सुरक्षा खतरा पैदा नगर्ने बताउँदै आएका छन्।
गुप्तचर प्रमुखकै यो पछिल्लो प्रतिवेदनले ट्रम्प प्रशासनको युद्ध नीतिको भित्री आधारमाथि गम्भीर नैतिक र रणनीतिक प्रश्न खडा गरिदिएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया