जनकपुरधाम । मधेश प्रदेशका मुख्यमन्त्री कृष्णप्रसाद यादवले आज मन्त्रिपरिषद् विस्तार गर्ने तयारी गरेका छन् ।
सातदलीय गठबन्धनको सहमतिअनुसार जनमत पार्टीबाहेक अन्य दलबाट मन्त्रालयसहित एक–एक जना मन्त्री नियुक्त गर्ने तयारी भइरहेको छ ।
आज बसेको सातदलीय गठबन्धनको बैठकले तत्काल गठबन्धनमा सहभागी सात दलबाट प्रतिनिधित्व हुने गरी मन्त्रालय तोकेर मन्त्री नियुक्त गर्ने निर्णय गरेको बैठकमा सहभागी एक नेताले जानकारी दिए । उनका अनुसार आगामी पुस ४ गते मुख्यमन्त्री यादवले प्रदेश सभामा विश्वासको मत लिने निर्णयसमेत भएको छ ।
मुख्यमन्त्री यादव गत मङ्सिर १९ गते छ दलको समर्थनमा नेपाली कांग्रेस संसदीय दलका नेताको हैसियतमा मुख्यमन्त्री नियुक्त भएका थिए ।
उनले मङ्सिर २१ गते प्रदेश प्रमुखबाट पद तथा गोपनियताको सपथ लिएका थिए । त्यसलगत्तै उनले तीन दलबाट तीन जना मन्त्री नियुक्त गरेका थिए ।
जनमत पार्टीबाट संसदीय दलका नेता महेशप्रसाद यादव अर्थमन्त्री बनेका थिए भने नेपाली कांग्रेसबाट जङ्गीलाल राय यादव र नेकपा (एकीकृत समाजवादी) बाट कनिश पटेल बिना विभागीय मन्त्री नियुक्त भएका थिए ।
सातदलीय गठबन्धनमा मन्त्रालय भागबण्डा नमिल्दा हालसम्म दुई जना मन्त्री बिना विभागीय रहँदै आएका छन् । आज हुने मन्त्रिपरिषद् विस्तारमा ती दुवै मन्त्रीलाई मन्त्रालय दिँदै अन्य दलबाट समेत प्रतिनिधित्व गराउने तयारी मुख्यमन्त्री यादवले गरेका हुन् ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया