काठमाडौं। ट्युनिसियामा आप्रवासी बोकेको डुंगा दुर्घटना हुँदा कम्तीमा ४० जनाको मृत्यु भएको छ। संयुक्त राष्ट्रसंघको अन्तर्राष्ट्रिय आप्रवासन संगठन (आईओएम) का अनुसार ट्युनिसियाको सालाक्टा गाउँबाट छुटेको उक्त डुंगा केहीबेरमै समुद्रमा पल्टिएको थियो।
डुङ्गामा सवार मृतकमध्ये ९ महिला, १९ पुरुष र पाँच वर्षमुनिका १२ बालबालिका रहेका छन्। उनीहरू सबै अफ्रिकी मुलुकका नागरिक भएको बताइएको छ। दुर्घटनापछि नजिकैको माछा मार्ने डुङ्गाबाट सूचना प्राप्त भएपछि उद्धार टोलीले ३० जनालाई जीवितै बचाएको आईओएमले जनाएको छ। उद्धार भएकामध्ये क्यामरून, आइभरी कोस्ट र गिनीका नागरिक रहेका छन्।
आईओएमका अनुसार यो दुर्घटना यस वर्ष उत्तरी अफ्रिकी तटमा भएका सबैभन्दा घातक समुद्री घटनामध्ये एक हो। “यो दुर्घटनाले मध्य भूमध्यसागरीय मार्गमा थप जनधनको क्षति रोक्नका लागि तत्काल समन्वित कार्यको आवश्यकता देखाएको छ,” — अन्तर्राष्ट्रिय आप्रवासन संगठन (आईओएम)
आईओएमको बेपत्ता आप्रवासी परियोजना का अनुसार यो वर्ष मात्रै मध्य भूमध्यसागरीय मार्गमा झण्डै एक हजार मानिस मृत्यु वा बेपत्ता भएका छन्। सन् २०१४ देखि हालसम्म उत्तरी अफ्रिकाबाट युरोप पुग्ने प्रयासमा २५ हजारभन्दा बढी आप्रवासीको मृत्यु भइसकेको छ, जसले यो मार्गलाई विश्वकै सबैभन्दा घातक प्रवास मार्ग बनाएको छ।
यो पछिल्लो घटनासँगै भूमध्यसागरीय क्षेत्रमा ३२ हजार ८ सयभन्दा बढी मानिस बेपत्ता भइसकेको आईओएमले जनाएको छ। सबैभन्दा बढी प्रभाव बालबालिकामा परेको बताइएको छ। केवल २०२५ सालमै ट्युनिसियाको तटमा कम्तीमा ३० जनाको मृत्यु भइसकेको छ, जबकि सन् २०२४ मा यो संख्या २२ मात्र थियो।
छिमेकी देश लिबियामा बढ्दो असुरक्षा र कडा नियन्त्रणका कारण इटाली पुग्न चाहने आप्रवासीका लागि अहिले ट्युनिसिया प्रमुख प्रस्थान बिन्दु बनेको छ। संयुक्त राष्ट्र शरणार्थी उच्चायुक्त (यूएनएचसीआर) का अनुसार ट्युनिसियामा हाल १० हजार ६ सयभन्दा बढी शरणार्थी र आश्रय खोज्ने व्यक्ति दर्ता छन्, जसमा ८६ प्रतिशत युद्ध र हिंसाबाट प्रभावित देशका नागरिक हुन्।
तीमध्ये धेरैजना यातना, लैंगिक हिंसा र परिवारबाट छुट्टिएका अवस्थाबाट बाँचेर आएका छन्। आवश्यक सेवामा पहुँच अभाव, आर्थिक संकट र सुरक्षा जोखिमका कारण उनीहरू जोखिमपूर्ण समुद्री यात्रामा निस्किन बाध्य भएको जनाइएको छ।
आईओएमले भूमध्यसागरीय क्षेत्रमा मानवीय संकट रोक्नका लागि सुरक्षित र नियमित प्रवास मार्गहरू विस्तार गर्न आह्वान गरेको छ। संस्थाले प्रमुख प्रवास मार्ग भएका देशहरूबीच समन्वय र सहयोग मजबुत गर्न आग्रह गर्दै भनेको छ —
“मानवीय सिद्धान्तले नै आप्रवासनसम्बन्धी सबै निर्णय र कार्यलाई निर्देशित गर्नुपर्छ।”
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया