काठमाडौं । अमेरिकी राष्ट्रपति डोनाल्ड ट्रम्पले भेनेजुएलामा **केन्द्रीय गुप्तचर निकाय (सीआईए)**लाई अभियान सञ्चालन गर्न अनुमति दिएका छन्। ट्रम्पको यस कदमविरुद्ध दक्षिण अमेरिकी देशका नेताहरूले कडा आपत्ति जनाएका छन्।
बीबीसी र न्युयोर्क टाइम्सका रिपोर्टअनुसार, ट्रम्पको स्वीकृतिपछि सीआईएलाई भेनेजुएलामा एकपक्षीय रूपमा वा कुनै विस्तारित अमेरिकी सैन्य अभियानको हिस्साका रूपमा कारबाही गर्न सक्ने बाटो खुलेको छ।
पछिल्ला हप्ताहरूमा अमेरिकी सेनाले क्यारिबियन सागरमा लागुऔषध तस्करीको आशंकामा कम्तीमा पाँच पटक विभिन्न जहाजहरूमा आक्रमण गरेको थियो। ती घटनामा २७ जनाको मृत्यु भएको अन्तर्राष्ट्रिय समाचार माध्यमहरूले जनाएका छन्।
संयुक्त राष्ट्रसंघका मानव अधिकार विशेषज्ञहरूले यी कारबाहीहरूलाई “गैरकानुनी हत्या” का रूपमा व्याख्या गरेका छन्। यसैबीच, भेनेजुएलाका राष्ट्रपति निकोलस मादुरोले टेलिभिजन सम्बोधनमार्फत अमेरिकासँग शान्तिको अपील गरेका छन्।
बुधबार ओभल अफिसमा पत्रकारहरूसँग कुराकानी गर्दै ट्रम्पलाई यस विषयमा प्रश्न सोधिएको थियो। एक पत्रकारले सोधे, “तपाईले सीआईएलाई भेनेजुएलामा अभियान चलाउन किन अनुमति दिनुभयो?”
जवाफमा ट्रम्पले भने, “मैले दुई कारणले अनुमति दिएँ — पहिलो, भेनेजुएलाले आफ्ना जेलका कैदीहरू अमेरिकामा पठाइरहेको छ। दोस्रो, लागुऔषध समस्या हो। भेनेजुएलाबाट ठूलो मात्रामा लागुऔषध समुद्र र जमिन दुबै मार्गबाट प्रवेश गर्छ, र हामी त्यसलाई रोक्नेछौं।”
हाल सीआईएले उक्त अभियानका लागि तयारी थालेको छ वा छैन भन्नेबारे आधिकारिक पुष्टि भएको छैन, तर दक्षिण अमेरिकी क्षेत्रमा सीआईएको दीर्घ इतिहास र प्रभाव रहेको बताइन्छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया