काठमाण्डाै। यो अंग्रेजी वर्ष अर्थात् सन् २०२३ मा १० लाख पर्यटक भित्र्याउने सरकारको लक्ष्य पूरा भएको छ ।
कोरोना महामारीले थलिएको पर्यटन व्यवसाय पुनराेत्थानका लागि सरकारले यो वर्ष १० लाख पर्यटक भित्र्याउने लक्ष्य राखेको थियो ।
सरकारको लक्ष्य आज बुधवार पूरा भएको हो । यस वर्ष आज बिहान ५ बजेसम्ममा ९ लाख ९९ हजार १ सय ९ जना पर्यटक भित्रिएका नेपाल पर्यटन बोर्डको तथ्याङ्क छ ।
आज दिउँसो ४ बजेसम्ममा थप तीन हजार जनाभन्दा धेरै पर्यटक भित्रिएका अध्यागमन विभागले जनाएको छ । सन् २०२३ सकिन चार दिन बाँकी छँदै सरकारको लक्ष्य पूरा भएको नेपाल पर्यटन बोर्डका निर्देशक मणिराज लामिछानेले जानकारी गराएका छन् ।
कोरोना महामारी शुरु हुनुअघि सन् २०१९ मा नेपालमा ११ लाख ९७ हजार एक सय ९१ जना विदेशी पाहुना हवाई माध्यमबाट भित्रिएका थिए । तर कोरोना महामारीका कारण सन् २०२० मा नेपालमा विदेशी पर्यटकको सङ्ख्या दुई लाख ३० हजार ८५ जनामात्रै थियो । त्यो सङ्ख्या अझै घटेर सन् २०२१ मा १ लाख ५० हजार ९ सय ६२ जना विदेशी पर्यटक मात्रै नेपाल आए ।
कोभिड-१९ बाट बच्न लगाइएका प्रतिबन्धहरू हटेपछि सन् २०२२ मा ६ लाख १४ हजार १ सय ४८ जना पर्यटक नेपाल आएका थिए ।
सरकारले अझै राम्रोसँग बजारीकरणसहित पोखरा र भैरहवा विमानस्थलमा अन्तर्राष्ट्रिय उडान भएको भए सन् २०१९ कै हाराहारीमा पर्यटक आउने सम्भावना रहेको निर्देशक लामिछानेले बताएका छन् ।
तर यस वर्षको पर्यटक आगमन पनि नेपालका लागि उत्साहपूर्ण रहेको उनको भनाइ छ । यो वर्ष नेपालमा भारत, अमेरिका र चीनबाट आउने पर्यटकको सङ्ख्या उल्लेख्य बढेको छ । पर्यटन बोर्डले अब वार्षिक १२ लाख पर्यटक भित्र्याउने गरी तयारी शुरु गरेको जनाएको छ ।
प्रतिक्रिया