कठमाडौं । शुक्रबार भारतीय सेनाले सोधपुछका लागि बोलाइएका आठ जनामध्ये तीन जना मृत फेला परेपछि जम्मू-कश्मीर प्रहरीले आइतबार अज्ञात व्यक्तिहरू विरुद्ध हत्याको मामिलामा एफआईआर दर्ता गरेको छ ।
तीन जनाको शव शनिबार भेटिएको थियो र उनीहरुको शरीरमा चोटका निशानहरू थिए । सामाजिक सञ्जालमा २९ सेकेण्डको भिडियो भाइरल भएपछि मामिला चर्कियो । त्यसपछि उक्त क्षेत्रमा तनाव बढेको थियो ।
मृत भेटिएका तीन जनामा ४८ वर्षीय सफिर अहमद, सोही गाउँमा बस्ने उनका दुई नातेदार २८ वर्षीय मोहम्मद शौकत र २५ वर्षीय शबिर अहमद रहेका छन् ।
भाइरल भिडियोमा केही व्यक्तिले तीन जनालाई निर्वस्त्र बनाएर खुर्सानीको धुलो छर्किरहेका छन् । उनीहरू सबै सेनाका जवान भएको दाबी गरिएको छ र यो भिडियो आर्मी क्याम्पमा खिचिएको बताइएको छ ।
अङ्ग्रेजी दैनिक द हिन्दूका अनुसार भारतीय दण्ड संहिता (आईपीसी) को धारा ३०२ अन्तर्गत पुन्चको सुरनकोट पुलिस स्टेशनमा एफआईआर दर्ता गरिएको छ ।
जम्मु कश्मीर सरकारले पुन्छमा मारिएका यी ३ जनाको परिवारलाई क्षतिपूर्ति र जागिर दिने घोषणा गरेको छ। गम्भीर घाइते पाँच जनालाई स्थानीय अस्पतालमा भर्ना गरिएको छ । उनीहरू सबै गुजर-बकरवाल जनजाति समुदायका हुन् ।
यसअघि २१ डिसेम्बरमा पुन्च-राजौरीमा सेनाको सवारीमा हमला भएको थियो। उक्त आक्रमणमा चार सैनिकको मृत्यु भएको थियो भने तीन जना घाइते भएका थिए ।
त्यसपछि सुरक्षाकर्मीले आठ जनालाई नियन्त्रणमा लिएको थियो । आक्रमणमा संलग्न चरमपन्थीहरुको भने अहिलेसम्म पहिचान हुन सकेको छैन ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया