टेनेसी (एजेन्सी)। अमेरिकाको टेनेसी राज्यमा रहेको एक सैन्य विस्फोटक पदार्थ निर्माण गर्ने कारखानामा भीषण विस्फोट हुँदा कम्तीमा १९ जना बेपत्ता भएका छन्। शुक्रबार बिहान भएको उक्त विस्फोटपछि कारखानाको ठूलो भाग पूर्ण रूपमा ध्वस्त भएको स्थानीय प्रशासनले जनाएको छ।
हम्फ्रेज काउन्टीका शेरिफ क्रिस डेभिसले पत्रकार सम्मेलनमार्फत यो ठूलो दुर्घटनाले कारखानालाई सम्पूर्ण रूपमा क्षतिग्रस्त बनाएको बताए। उनका अनुसार चारदेखि पाँच जना घाइतेलाई नजिकको अस्पताल लगिएको छ भने केहीको मृत्यु भएको पुष्टि भइसकेको छ, यद्यपि मृतकको सङ्ख्या खुलाइएको छैन।
विस्फोट भएको कारखाना एक्युरेट एनरजेटिक सिस्टम्सको स्वामित्वमा रहेको बताइएको छ। कम्पनीले विस्फोटक पदार्थको विकास, निर्माण, ह्यान्डलिङ र भण्डारणमा विशेषज्ञता राख्छ। कारखाना नासभिलबाट करिब ९० किलोमिटर दक्षिण–पश्चिम पर्ने बक्सनोर्ट क्षेत्रमा अवस्थित छ।
विस्फोटको कारण अहिले सम्म स्पष्ट हुन सकेको छैन। शेरिफ डेभिसले भने, “यो घटना भएको बेला प्लान्ट पूर्ण रूपमा सञ्चालनमा थियो र विस्फोट यति शक्तिशाली थियो कि यसले करिब आधा वर्ग माइल क्षेत्रभित्र भग्नावशेष छरपस्ट बनायो।”
उनका अनुसार, बिहान काम सुरु गर्दै गरेका मजदुरहरू हाल बेपत्ता रहेका छन्। “हामीले १९ आत्मा गुमाइरहेका छौँ,” उनले भावुक हुँदै भने। स्थानीय मिडियामा सार्वजनिक भएका भिडियोहरूमा कारखानाको जलेको भग्नावशेष, धुवाँ निस्किरहेका गाडीहरू र कारखानाको केही भाग मात्र सग्लो देखिन्छ।
डेभिसका अनुसार उद्धारकर्मीहरूलाई अझै पनि दोस्रो विस्फोटको जोखिम भएकाले केही समय घटनास्थलमा प्रवेश गर्न कठिनाइ भइरहेको छ। टेनेसीका गभर्नर बिल लीले सामाजिक सञ्जालमार्फत यो “दुःखद र गम्भीर दुर्घटना” भएको जनाउँदै राज्य सरकार घटनाको नजिकबाट निगरानी गरिरहेको बताएका छन्।
फेडरल अनुसन्धान निकाय (एफबीआई) र अन्य सुरक्षासम्बन्धी संस्था पनि घटनास्थलमा पुगेका छन्। हालसम्म विस्फोट दुर्घटना थियो वा जानाजान गरिएको भन्नेबारेमा कुनै पुष्टि भएको छैन। स्थानिय बासिन्दाहरूले विस्फोटको आवाज करिब २५ किलोमिटर टाढासम्म सुन्न सकिएको बताएका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया