काठमाडौँ । विप्लव नेतृत्वको नेपाल कम्युनिष्ट पार्टी निकट जनसाँस्कृतिक सहासंघले गायक पशुपति शर्मालाई गित हटाउन बाध्य पारेपछि त्यस्तो धम्कि दिनेहरु प्रति कडाशब्दमा विरोध जनाएको छ ।
महासंघका अध्यक्ष माइला लामाले आइतवार एक बिज्ञप्ति जारी गर्दै गायक पशुपति शर्मालाइ यूट्युबबाट गित हटाउन धम्क्याउने सरकारी नेकपाका कार्यकर्तालाई त्यसो नगर्न कडा चेतावनी समेत दिएका छन् ।
जारी गरिएको विज्ञप्तिमा देशमा भएको गलत कुराको गीतसंगीत मार्फत भण्डाफोर गरिएकाले सरकार तर्सिएर उनको गीतमा प्रतिबन्ध लगाउने हिसाबले आफ्ना कार्यकर्तालाई उक्साएर शर्मालाई धम्क्याएको जनाइएको छ।
गलत कार्यको भण्डाफोरबाट अतालिएकोस अर्कार र तिनका कार्यकर्ताको त्यस्तो हर्कतलाई महासंघले फासिवादी कार्यको संज्ञा दिएिको छ । विज्ञप्तिमा सरकारले शर्माको गीतलाई हटाउन बाध्या पारेर जनताको अभिव्यक्ति स्वतनत्रतामाथी हस्तक्षेप गरेको भन्दै सो गीतमाथीको प्रतिबन्ध तत्काल फुकुवा नगरे जस्तोसुकै कदमपनि चाल्ने र त्यसको जिम्मेवार सरकार हुुपर्ने चेतावनी दिइएको छ ।
गायक पशुपति शर्माले बिहिबार मात्र यूट्युबमा राखेको उक्त गीत दुइ दिनमै ३ लाख जति पाठक श्रोताले हेरिसकेका थिए । ओली-प्रचण्डका कार्यकर्ताले धम्की दिएको भन्दै गायक शर्माले उक्त गीत यूट्युबबाट हटाउनुपर्ने बाध्यता आएको जानकारी दिन बिज्ञप्ति नै जारी गरेका थिए ।
उनको गीत हटाइएपछि सामाजिक सञ्जालमा ब्यापक बिरोध जनाइएको छ । गायक शर्माको पक्षमा देश बिदेशमा रहेका उनका फ्यानहरुले ब्यापक बिरोध जनाएपछि आइतबार दिउसो लोकदोहोरी प्रतिष्ठानले गायक शर्माकै पक्षमा निर्णय गरेको बताइएको छ ।
जनसास्कृतिक महासंघले जारी गरेको बिज्ञप्ति जस्ताको तस्तै
प्रेस केपी–प्रचण्डको सरकार यतिबेला दुईतिहाइको कम्युनिस्ट आवरणमा दिन–प्रतिदिन देश र जनताका विरुद्ध जाइलाग्दै छ । ‘शान्ति र समृद्धि’ को भाषण गरेर नथाक्ने यो सरकारले पशुपति शर्माको ‘लुट कान्छा लुट सकेजति लुट अरू देशमा पाइँदैन नेपालमै हो छुट’ बोलको जागरणमूलक गीतमाथि जाइलाग्दै बन्द गराएको छ । सरकार, सरकारका केही मन्त्री र सरकारनिकट भातृ सङ्गठनको धम्कीपूर्ण चर्को दबाबपछि यो गीतलाई अहिले यु–ट्युबबाट हटाइएको छ ।
सरकारको यो हददर्जाको निकृष्ट रवैयाप्रति हाम्रो सङ्गठनको गम्भीर ध्यानाकर्षण भएको छ । यो सरकारको अर्को निकृष्ट र निर्लज्ज सामाजिक फासिवादी हर्कत हो । नेपाली समाज आज विभिन्न समस्याबाट गुज्रिरहेको छ । अधिकांश समस्याका मुख्य कारक तत्व सरकार आफैँ बन्न पुगेको छ । सरकारकोे यस किसिमको रवैयाको चारैतिरबाट विरोध र भत्र्सना पनि हुँदै आएको छ । यही विरोध, भण्डाफोर र जनजागरणस्वरूप पशुपति शर्माले प्रस्तुत गीतबाट नेपाली जनताका बीचमा जुन जागरण फैलाउन कोसिस गर्नुभएको छ, त्यसको निम्ति हामी पशुपति शर्मालाई धेरै धेरै धन्यवाद दिन चाहन्छौँ ।
देशभक्त, क्रान्तिकारी, परिवर्तनप्रेमीहरूलाई कथित दुईतिहाइको दम्भमा बन्दुक र बुटको आतङ्क सिर्जना गर्दै देश र जनताका विरुद्ध उभिएको यो सरकारका विरुद्ध गीतबाट यति बोल्नु पनि साहसिक कार्य हो । यस्तो साहसिक कार्य गर्नुभएकोमा हामी उहाँलगायत यो गीतसित सम्बद्ध सबैलाई हार्दिक बधाई पनि भन्न चाहन्छौँ ।
नेपालको हरेक राजनीति परिवर्तनमा नेपालका लेखक, साहित्यकार तथा कलाकारहरूले आ–आफ्नो क्षेत्रबाट महत्वपूर्ण योगदान दिंदै आउनुभएको छ । महान् जनयुद्धमा कलाकारहरूको अत्यन्त महत्वपूर्ण भूमिका थियो । जनयुद्धको दौरान कैयौँ कलाकारले बलिदानको कोटा पनि चुक्ता गर्नुभयो । जनविरोधी शासनव्यवस्था अस्वीकार गरेकै भरमा कवि कृष्ण सेन ‘इच्छुक’ लाई सत्ताले महेन्द्र पुलिस क्लबमा कुटीकुटी हत्या गरेको थियो । जनआन्दोलनको दौरानमा सहरका कलाकारहरूले सडकमै उत्रिएर परिवर्तनको स्वर घन्काउनुभएको थियो । ती कलाकारको जुन बलिदान, जुन परिवर्तनको स्वरले वर्तमान सरकार सत्तासीन हुन पुगेको छ, आज तिनै कलाकारलाई यो सरकार दुश्मन ठानिरहेको छ । यो आश्चर्यको विषय हो ।
कुनै पनि देशका न्यायप्रेमी तथा स्वतन्त्रताप्रेमी नागरिक खराब शासक र खराब व्यवस्थालाई स्वीकार्न बाध्य छैनन् । कलाकारले गीतका माध्यमबाट आफ्ना भावना व्यक्त गर्न रोक लगाउनु सरासर फासिवादी चिन्तनको उपज हो । यसले सरकार जनताको कुरा सुन्न तयार छैन भन्ने कुरालाई नै प्रमाणित गर्दछ । जनताका मौलिक हक–अधिकारका खिलाफ स्वयम् सरकार उभिएपछि यतिबेला तिनका विरुद्ध सशक्त प्रतिवाद गर्नु, प्रतिरोध गर्नु जनताको नैसर्गिक अधिकार बन्न पुगेको छ ।
आज राष्ट्रियता, जनतन्त्र र जनजीविकाको प्रश्न गम्भीर मोडमा पुगेको त छँदै छ, सरकार जनताका लेखक, साहित्यकार तथा कलाकारलाई खतरनाक दुश्मन ठान्दै तिनका विरुद्ध व्यापक दमनमा उत्रिएको छ । पशुपति शर्मा र उहाँको उक्त गीतमाथिको प्रतिबन्धलाई हामीले फासिवादी प्रकरणको निरन्तरताको नयाँ परिघटनाका रूपमा लिएका छौँ ।
अखिल नेपाल जनसांस्कृतिक महासङ्घले जनताका हरेक न्यायपूर्ण परिवर्तनकारी राजनीतिक–सांस्कृतिक आन्दोलनमा महत्वपूर्ण भूमिका निर्वाह मात्र गरेको छैन, यसले इच्छुकलगायत १७० भन्दा बढी सांस्कृतिक योद्धाहरूले बलिदानको कोटा चुक्ता गरिसकेको छ । हाम्रो सङ्गठन जनताका आवाज–भावना मुखरित गर्ने कुनै पनि कलाकार र तिनका सिर्जनकर्ममाथि हुने दमनको विरुद्ध उभिन चाहन्छ, प्रतिरोध गर्न चाहन्छ । जनताका आवाज मुखरित गर्ने गीतलाई प्रतिबन्ध लगाइनु अत्यन्त निन्दनीय छ ।
यसर्थ, हामी जनताका पक्षमा उभिने कुनै पनि कला तथा कलाकारको अभिव्यक्ति स्वतन्त्रतालाई सम्मान गर्न सम्बन्धित पक्षसित अपील गर्दछौँ, अन्यथा हामी यो सरकारका विरुद्ध सशक्त प्रतिरोध गर्न बाध्य हुनेछौँ, जसबाट उत्पन्न हुने परिस्थितिको भागीदार स्वयम् सरकार हुने कुरा पनि हामी यसै विज्ञप्तिमार्फत चेतावनी दिन चाहन्छौँ
माइला लामा
अध्यक्ष
जनसास्कृतिक महासंघ
कमल बुढा 
प्रतिक्रिया