काठमाडौँ । आजदेखि नेपालीहरूको नयाँ बर्ष विसं २०८३ को औपचारिक सुरुआत भएको छ। नयाँ वर्ष केवल पात्रो फेरिने दिन मात्र होइन, आशा, ऊर्जा र नयाँ सङ्कल्प बोकेर आउने एउटा महत्वपूर्ण मोडका रूपमा पनि लिइन्छ। वैशाख १ गतेको यो दिन देशभर हर्षोल्लासका साथ शुभकामना आदानप्रदान, भेटघाट गरी मनाइँदै छ।
नेपालमा वैशाख १ गतेलाई नयाँ वर्षका रूपमा मनाउने परम्परा पुरानो र सांस्कृतिक रूपमा गहिरो छ। विश्वभर विभिन्न शैलीमा नयाँ वर्ष मनाइए पनि नेपालमा भने विक्रम संवत अनुसार वर्षको गणना हुँदै आएको छ, जसलाई सबैभन्दा पुरानो र वैज्ञानिक संवतहरूमध्ये एक मानिन्छ।
आजको दिन खगोलशास्त्रीय हिसाबले पनि विशेष मानिन्छ। सूर्यले मीन राशिबाट आफ्नो यात्रा समाप्त गरी मेष राशिमा प्रवेश गर्ने क्षणलाई मेष सङ्क्रान्ति का रूपमा मनाइन्छ। सूर्यको गतिसँग आधारित भएकाले विक्रम संवत् दीर्घकालीन र स्थिर मानिन्छ भन्ने विद्वानहरूको धारणा छ।
नयाँ वर्षको दिन नेपाली समाजमा आत्ममूल्याङ्कनको अवसर पनि हो। विगत वर्षका सफलता–असफलताबाट सिक्दै, नयाँ लक्ष्य तय गर्ने र सकारात्मक परिवर्तनको सङ्कल्प लिने परम्परा आज पनि उत्तिकै जीवित छ।
यस दिन बिहानै नुहाउने, घरआँगन सफा गर्ने, मठमन्दिरमा पूजा गर्ने, मीठा परिकार खाने र आफन्त तथा साथीभाइसँग भेटघाट गरी शुभकामना साटासाट गर्ने चलन रहिआएको छ। देश–विदेशमा रहेका नेपालीहरूले पनि यो दिनलाई विशेष रूपमा मनाउँदै आएका छन्।
नयाँ वर्षको अवसरमा रामचन्द्र पौडेल, रामसहायप्रसाद यादव लगायत विशिष्ट व्यक्तित्वहरूले शुभकामना सन्देश दिँदै देशको उन्नति, प्रगति र समृद्धिको कामना गरेका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया