काठमाडौँ । विश्वका ६ हजार भन्दा बढी जहाजहरू शनिबार अस्थायी रूपमा ग्राउन्डेड भएका छन्।
युरोपेली विमान निर्माता कम्पनी एयरबसले ए३२० सिरिजका विमानको सफ्टवेयरमा समस्या देखिएकाले सबै विमानहरुमा त्यसको चेकजाँच गर्नू भनेपछि विश्वका विभिन्न एयरलाइन्सहरूको उडान अवरूद्ध भएको हो।
अन्तर्राष्ट्रिय समाचार संस्था रोयटर्सका अनुसार गत अक्टोबर ३० मा मेक्सिकोको क्यानकुनबाट न्यू जर्सी उडेको जेटब्लु अचानक उचाई गुमाउँदै तीव्र गतिमा तल खसेको थियो। घटनामा केही यात्रु घाइते समेत भएका थिए।
सोही विमानको प्राविधिक जाँचबुझ क्रममा सफ्टवेयरमा गडबढी भएको फेला परेपछि एयरबसले सबै विमानहरूमा चेकजाँच गर्न भनेको रोयटर्सले जनाएको छ। यसले एयरबसका विश्वभर सञ्चालनमा रहेका ए३२० सिरिजका आधाभन्दा बढी विमान प्रभावित भएको बताइएको छ।
यसपछि विभिन्न एयरलाइन्सहरूले आकस्मिक रूपमा सफ्टवेयर मर्मतपछि सञ्चालन गरिसकेका छन् भने धेरै विमानहरू प्राविधिक समस्या समाधान पश्चात मात्रै उड्ने गरी अस्थायी रूपमा ग्राउन्डेड भएका छन्।
केही साताअघि मात्र ए३२० ले बोइङ ७३७ लाई उछिनेर सबैभन्दा धेरै डेलिभरी हुने मोडलको रूपमा स्थापित भएको थियो। यो घटनापछि एयरबसलाई ठूलो धक्का लागेको विश्लेषकहरूले बताएका छन्।
एयरबसले विश्वभरका करिब ३५० अपरेटरलाई आपतकालीन रूपमा सफ्टवेयर मर्मत गर्न निर्देशन दिएपछि एयरलाइन्सहरूले रातभर काम गरेर समस्याको समाधान गरेका थिए।
नियामक निकायहरूले पनि उडान पुनः सुरु गर्नुअघि अनिवार्य रूपमा सफ्टवेयर सुधार गर्न निर्देशन दिएका छन्। यसले अधिकांश अन्तर्राष्ट्रिय विमानस्थलमा उडानमा ढिलाइ भएको थियो। संसारकै ठूलो ए३२० सञ्चालक अमेरिकन एयरलाइन्सले आफ्ना ४८० वटा ए३२० मध्ये २०९ विमानमा सुधार गर्नुपर्ने जनाएको छ।
डेल्टा एयरलाइन्स, जेटब्लु र युनाइटेड एयरलाइन्सको सेवा प्रभावित भएको छ। युरोपमा लुफ्थान्सा र इजी जेटले पनि मर्मत गरिरहेको रोयटर्सले जनाएको छ। एसिया क्षेत्रमा ठूलो असर देखिएको छ।
भारतको उड्डयन नियामकले देशका ३३८ एयरबस विमान प्रभावित भएको जनाएको छ। भारतकै सबैभन्दा ठूलो एयरलाइन्स इन्डिगोले २०० मध्ये १६० विमानमा सफ्टवेयर रिसेट सकिएको बताए पनि ढिलाइ हुने चेतावनी दिएको छ।
जापानको सबैभन्दा ठूलो एयरलाइन्स एएनए होल्डिङ्सले शनिबार मात्र ९५ वटा उडान रद्द गर्नुपरेको र करिब १३ हजार ५०० यात्रु प्रभावित भएको जनाएको छ। दक्षिण कोरियामा ४२ वटा विमानमा सुधार भइरहेको त्यहाँको यातायात मन्त्रालयले जनाएको छ।
हङकङको बजेट एयरलाइन्स एचके एक्सप्रेसले आधाभन्दा बढी विमानमा सुधार सकिएको भन्दै उडान सामान्य अवस्थामा फर्किएको बताएको छ। हालसम्मको मूल्याङ्कनमा सफ्टवेयरलाई पुरानो संस्करणमा फर्काउनु नै मुख्य समाधान भएको जनाइएको छ।
यद्यपि विश्वव्यापी रूपमा श्रमशक्ति र पार्ट्सको अभाव भइरहेका बेला यस्तो आकस्मिक मर्मत कार्यले एयरलाइन्सहरूलाई आर्थिक र सञ्चालनगत दुवै दृष्टिले चुनौती थपेको उद्योग विश्लेषकहरूले बताएका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया