काठमाडौं । काठमाडौंको तारकेश्वर नगरपालिका–५, गोलढुंगा फूलबारी गेट नजिक बुधबार राति एक युवकलाई धम्क्याएर लुटपाट गरेको आरोपमा दुई जना पक्राउ परेका छन्।
पक्राउ पर्नेमा मकवानपुर भिमफेदी गाउँपालिका–५ का २६ वर्षीय सूर्यबहादुर घलान र सिन्धुली दुधौली नगरपालिका–१० का २३ वर्षीय मनोज चौधरी रहेका छन्। दुवै जना हाल काठमाडौंको बूढानीलकण्ठमा बस्दै आएका थिए।
प्रहरीका अनुसार उनीहरू बा ४२ प ४०६९ नम्बरको कालो पल्सर मोटरसाइकलमा आएका थिए। राति करिब ११ बजे ती दुई जनाले धारिलो हतियार देखाएर एक युवकको ब्याग लुटेका थिए।
घटनापछि तत्काल खटिएको प्रहरी टोलीले उनीहरूलाई मोटरसाइकल र लुटिएको ब्यागसहित नियन्त्रणमा लिन सफल भएको थियो। लुटिएको ब्यागभित्र केही नगद, ‘Rolex’ लेखिएको घडी, र अन्य व्यक्तिगत सामग्री फेला परेको प्रहरीले जनाएको छ।
पक्राउ परेकाको साथबाट खुकुरी र ट्रामाडोल नामक लागुऔषध पनि बरामद गरिएको छ। हाल उनीहरूलाई प्रहरी वृत्त बालाजुमा राखी थप अनुसन्धान भइरहेको प्रहरीले जानकारी दिएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया