सुनसरी । लगातारको अविरल वर्षापछि इलामका विभिन्न स्थानमा गएको बाढी र पहिरोले ठूलो जनधन क्षति पुर्याएको छ। जिल्लाका विभिन्न स्थानीय तहमा भएको पहिरोमा परेर कम्तीमा १८ जनाको मृत्यु भएको कोशी प्रदेश प्रहरी कार्यालय विराटनगरले जनाएको छ।
प्रहरीका अनुसार सूर्योदय नगरपालिका–१ मानेभञ्ज्याङमा ५ जनाको मृत्यु, माङसेवुङ गाउँपालिका–१ पाटीगाउँमा ३ जनाको मृत्यु, देउमाई नगरपालिका–५ धारेमा १ जनाको, र सोही वडाको धुसुनेमा २ जनाको मृत्यु भएको छ।
त्यस्तै, फाकफोकथुम गाउँपालिका–३ रातमाटेमा १ जनाको र इलाम नगरपालिका–५ घोसगाउँमा ६ जनाको मृत्यु भएको एसएसपी दीपक पोखरेलले जानकारी दिए। एसएसपी पोखरेलका अनुसार, पहिरो र बाढी प्रभावित क्षेत्रमा प्रहरी, सशस्त्र प्रहरी र नेपाली सेनाको टोली परिचालन गरिएको छ।
घाइतेहरूको उद्धार गरी उपचारका लागि सुरक्षित स्थानमा पुर्याइएको छ भने सम्भावित जोखिम क्षेत्रका बासिन्दालाई सतर्क रहन अनुरोध गरिएको छ। हाल पनि धेरै ठाउँमा सडक अवरुद्ध, सञ्चार र विद्युत् सेवा बाधित भएपछि उद्धार कार्यमा कठिनाइ भइरहेको छ। प्रशासनले पहिरो प्रभावित बस्तीमा राहत सामग्री पठाउने तयारी गरिरहेको छ।
स्थानीय बासिन्दाले भने, “रातभरै वर्षा र पहिरोको डरमा घर छाडेर सुरक्षित स्थानमा बस्नुपरेको थियो।” मौसम विभागले अझै केही दिन मध्यमदेखि भारी वर्षा जारी रहने सम्भावना जनाउँदै, जनतालाई सतर्कता अपनाउन आग्रह गरेको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया