काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले प्रतिनिधिसभामा हाल देखिएको अवस्थालाई ‘संसदीय इतिहासको कालो समय’ भनेका छन् ।
प्रतिनिधिसभाको सोमबार बसेको बैठकमा उनले भिजिट भिसा प्रकरण छानबिन माग गर्दै आइरहेका दलहरूको माग सुनुवाइ नगरेर संसद् सञ्चालन गरिहेकोमा आपत्ति जनाएका छन् ।
‘यो संसदीय इतिहासकै कालो समय हो । संसद्का दुई महत्त्वपूर्ण पार्टीहरूले डेढ महिनादेखि विरोध जनाइराख्दा जबरजस्ती संसद् चलाउने प्रयास भइराखेको छ,’ लिङ्देनले भने, ‘केवल सरकारको अकर्मण्यता, उदाशीनताको कुरा मात्रै होइन, सभामुख महोदय, तपाईंको आफ्नो कार्यकालको सबभन्दा कालो समयका रूपमा उल्लेख रहने छ ।’
उनले संसद्मा ‘छट्टु स्याल’को कथासँग नेपाली कांग्रेस र नेकपा एमाले मिलेर बनेको सरकारको तुलनासमेत गरे ।‘ राजावादीलाई तह लगायौँ, गणतन्त्र विरोधलाई तह लगायौँ भनेर डंका पिटेर जनतालाई भ्रम छरेको त के रहेछ, छट्टु स्यालको कथा पो रहेछ त हँ,’ लिङ्देनले भने, ‘चिल आयो, चिल आयो भन्ने, अनि तल चल्ला टिप्ने ?’
अध्यक्ष लिङ्देनले कांग्रेस–एमाले मिलेर देश लुटेको जनताले टुलुटुलु हेरेर बस्न नसक्ने पनि जिकिर गरे । उनले आफूहरू सरकारका गलत कामको संसद्मा विरोध गरिरहेको स्मरण गराउँदै आवश्यक परे सडक संघर्षमा उत्रिने पनि चेतावनी दिए ।
‘जनताको ध्यान एकातिर लगेर मन्त्रिपरिषद्मा बसेर सरकरा दुई ठूला–ठूला पार्टी मिलेर बनाएर देश लुटेर बस्ने र अरु जनताले टुलुटुलु हेरेर बस्नु पर्ने ? यो कुरा कदापि सैह्य हुँदैन, सभामुख महोदय,’ उनले भने, ‘यसको प्रतिवाद हुन्छ र हामी संसद्बाट पनि विरोध गरिराखेका छौँ । आवश्यक पर्यो भने सडकबाट पनि यसको प्रतिवाद गरिन्छ ।’
उनले भिजिट भिसा प्रकरणमा दुई महत्त्वपूर्ण राजनीतिक दलहरूले विरोधमा उठाइरहेको आवाजलाई गलत ब्याख्या नगर्न पनि सचेत गराए । लिङ्देनले भिजिट भिसामा जाने मानिसको विरोध गरिएको नभएर विदेश जाँदा नागरिकबाट गरिने असुलीको आफूहरूले विरोध गरेको प्रष्टीकरण दिए ।
‘मानिसहरू भिजिट भिसामै जाने हो । तर, भिजिट भिसाको नाममा मानिसहरूबाट योजनावद्ध जुन प्रकारको रकम असुली गरिराखिएको छ,’ उनले भने, ‘बेरोजगार युवाको रोजगार खोज्ने, अवसर खोज्ने जुन चाहनामाथि कमाउने धन्दा सरकारको तर्फबट सुनियोजित तरिकाले सञ्चालन गरिएको छ, त्यसको हामीले विरोध गरेको हो ।’
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया