सुर्खेत । नेकपा माओवादी केन्द्रका उपमहासचिव एवम् पूर्वअर्थमन्त्री जनार्दन शर्माले कर्णालीको विकासबिना समग्र देशको विकास सम्भव नरहेको बताएका छन् । सोमबार वीरेन्द्रनगरमा आयोजित कर्णाली उत्सवमा ‘कर्णालीको विकास मोडेल’ शीर्षकमा आफ्नो भनाइ राख्दै शर्माले कर्णालीको विकास गरेमात्रै देशको विकास सम्भव रहेको बताएका हुन् ।
‘कर्णाली एक सभ्यता हो, नेपाली भाषाको जननी हो, ऐतिहासिक विरासत बोकेको छ, इतिहासका काठमाडौँमा आक्रमण गर्न सक्ने क्षमता भएको थियो, हिजोको कर्णाली,’ उनले भने, ‘आधुनिक नेपालको प्रारम्भसँगै कर्णालीको विराट सभ्यता र भूगोल एउटा नदीको किनार वरिपरि सीमित गरियो । एउटा अञ्चलको रुपमा सीमित भयो । त्यसयता गरिबी, अभाव, दुर्गमता र विकटताबाट यो परिचित भयो । गएको दुई अडाई सय वर्ष केन्द्रीय शासनद्वारा प्रताडित भएर बाँचिरह्यो ।’
कर्णालीको न्यायका लागि कामी बुढाले रुकुमबाट २००८ साला विद्रोह सुरु गरेको र दैलेख हुँदै हुम्ला गौडा कब्जा गरेको कुरा शर्माले स्मरण गरे । त्यसपछि कामी बुढालाई गिरफ्तार गरी जुम्लामा राखियो र ११ सालमा हत्या गरिएको थियो । कर्णालीका महान् सहिदहरुले यसको स्वाभिमानलाई अझमाथि उठाएको उनले बताए ।
‘अब कर्णालीको परिभाषा फेर्नुपर्छ, विकासको मोडालिटीको कुरा गर्दा, कर्णाली किन पछि पर्यो भन्ने कुराबाट सुरु गर्नुपर्छ,’ उनले भने, ‘हाम्रो साधन, स्रोतहरुको कुरा गर्नपर्छ । प्राकृतिक साधन स्रोत भएको कर्णाली, रसिलो र पोसिलो स्याउको दाना टिप्ने हाम्रा चाउरीका अनुहारहरु, जीवनबुटी जस्ता यार्सागुम्बाहरु तर कमजोर आयु भएका हामी कर्णालीवासीहरू, यो अन्तर्विरोध छ । यसलाई समाधान गरिनुपर्छ ।’
शर्माले देशको विकास गर्न कर्णालीको विकास पहिला गर्नुपर्ने बताएका हुन् ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया