काठमाडौँ । यो साता नेपाली बजारमा सुनको मूल्य तोलामा २ सयले बढेको नेपाल सुनचाँदी व्यवसायी महासंघले जनाएको छ ।
३ गतेदेखि कारोबारमा आएको सुनको मूल्य ८ गतेसम्म आइपुग्दा जम्मा २ सयले बढेको हो । नेपाली नयाँ वर्षका कारण साताको पहिलो दिन सुनको कारोबार भएको थिएन र उक्त दिन शुक्रबार रहेको थियो । २ गते शनिबार भएकाले यो साता ६ दिन मात्रै सुनको मूल्यसूची कायम गरिएको महासंघले जनाएको छ ।
साताको पहिलो कारोबार दिन छापावाल सुनको मूल्य तोलामा १ लाख १० हजार रुपैयाँ थियो । जुन, साताको अन्तिम दिनसम्ममा आइपुग्दा तोलामा १ लाख १० हजार २ सय पुगेको हो ।
यस्तै, तेजाबी सुनको मूल्य तोलामा १ लाख ९ हजार ६ सय ५० रुपैयाँ तोकिएको छ । यसैगरी, यो साता चाँदीको मूल्य भने घटेको छ ।
आइतबार तोलामा १४ सय ५० रुपैयाँ रहेको चाँदीको मूल्य शुक्रबारसम्म आइपुग्दा ५ रुपैयाँ प्रतितोला घटेर १४ सय ४५ रुपैयाँमा कारोबार भएको महासंघले जनाएको छ ।
प्रतिक्रिया