काठमाडौं । दसैँ बिदापछि खुलेको बजारमा सुन र चाँदी दुवैको मूल्य घटेको छ। नेपाल सुनचाँदी व्यवसायी महासंघले सार्वजनिक गरेको मूल्यसूचीअनुसार आइतबार सुनको भाउ प्रतितोला ११ हजार ६०० रुपैयाँले घटेको हो।
महासंघका अनुसार आइतबार सुनको मूल्य प्रतितोला २ लाख ७८ हजार ५०० रुपैयाँ कायम भएको छ। यसअघि असोज ३० गते सुन प्रतितोला २ लाख ९० हजार १०० रुपैयाँमा कारोबार भएको थियो। यससँगै सुनको मूल्य प्रतिदश ग्राम २ लाख ३८ हजार ७७० रुपैयाँ कायम भएको महासंघले जनाएको छ।
दसैँअघि प्रतिदश ग्राम सुनको मूल्य २ लाख ४८ हजार ७१५ रुपैयाँ थियो। पछिल्लो मूल्यअनुसार प्रतिदश ग्राम सुन ९ हजार ९४५ रुपैयाँले सस्तिएको छ।
सुनसँगै चाँदीको मूल्यमा पनि गिरावट आएको छ। दसैँअघि प्रतितोला ४ हजार १५० रुपैयाँ रहेको चाँदीको मूल्य आइतबार घटेर ३ हजार ९५५ रुपैयाँमा झरेको छ। यसअनुसार चाँदी प्रतितोला १९५ रुपैयाँले सस्तिएको हो।
त्यस्तै, चाँदीको मूल्य प्रतिदश ग्राम ३ हजार ३९१ रुपैयाँ कायम भएको छ। दसैँअघि यही परिमाणको चाँदीको मूल्य ३ हजार ५५८ रुपैयाँ रहेको थियो।
महासंघले सार्वजनिक गरेको नयाँ मूल्यसूचीअनुसार दसैँपछिको पहिलो कारोबारमै सुनचाँदी दुवैको मूल्य घटेको देखिएको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया