मुम्बई । टी-२० विश्वकपको तयारीका क्रममा भएको वार्मअप खेलमा भारतले दक्षिण अफ्रिकालाई ३० रनले हराएको छ। नवी मुम्बईको डीवाई पाटिल स्टेडियममा टस जितेर पहिले ब्याटिङ गरेको भारतले ५ विकेटको क्षतिमा २४० रनको विशाल योगफल खडा गरेको थियो।
भारतका लागि इशान किशनले मात्र २० बलमा अर्धशतक प्रहार गरे भने तिलक वर्माले ४५, अक्षर पटेलले ३५ र कप्तान सूर्यकुमार यादवले ३० रन जोडे।
जवाफी ब्याटिङमा उत्रिएको दक्षिण अफ्रिकाले ७ विकेट गुमाएर २१० रन मात्र बनाउन सक्यो। दक्षिण अफ्रिकाका लागि ट्रिस्टन स्टब्सले ४५ र रायन रिकेल्टनले ४४ रन बनाए पनि टोलीलाई जित दिलाउन सकेनन्। भारतका अभिषेक शर्माले २ विकेट लिए।
विश्वकपअघिका अन्य अभ्यास खेलहरूमा पनि निकै रोचक प्रतिस्पर्धा देखिएको छ। बेंगलुरुमा भएको अर्को खेलमा नामिबियाले स्कटल्याण्डलाई ६ रनले पराजित गर्दै रोमाञ्चक जित हात पारेको छ।
पहिले ब्याटिङ गर्दै नामिबियाले २२६ रनको विशाल स्कोर खडा गरेको थियो, जसमा जान फ्राइलिंकले ८८ रनको योगदान दिए। स्कटल्याण्डका ब्रान्डन म्याकमुलनले ९५ रनको विष्फोटक पारी खेले पनि अन्तिम ओभरमा आवश्यक रन जोड्न नसक्दा टोली पराजित भयो।
त्यस्तै, अफगानिस्तानले वेस्ट इन्डिजलाई २३ रनले हराउँदै वार्मअप खेलमा लगातार दोस्रो जित दर्ता गरेको छ। इब्राहिम जदरान र रहमानुल्लाह गुरबाजको बलियो ओपनिङ साझेदारीको मद्दतमा १८२ रन बनाएको अफगानिस्तानले वेस्ट इन्डिजलाई १५९ रनमै रोकिदियो।
कोलम्बोमा हुने भनिएको पाकिस्तान र आयरल्याण्डबिचको खेल भने वर्षाका कारण टस समेत हुन नपाई रद्द भएको छ। दुवै टोलीका लागि यो एक मात्र वार्मअप खेल थियो।
अब पाकिस्तानले फेब्रुअरी ७ मा नेदरल्याण्ड्ससँग र आयरल्याण्डले फेब्रुअरी ८ मा श्रीलङ्कासँग विश्वकपको पहिलो खेल खेल्दै प्रतियोगिताको सुरुवात गर्नेछन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया