किभ । अमेरिकाको मध्यस्थतामा अबुधाबीमा भएको रुस–युक्रेन शान्ति वार्ताको पहिलो दिनलाई युक्रेनले राम्रो बताएको छ । वार्ता ठोस र उत्पादक भएको बताइएको छ । यद्यपि चार वर्षदेखि चलिरहेको युद्ध अन्त्यतर्फ निर्णायक प्रगति भएको घोषणा भने गरिएको छैन ।
युक्रेनको राष्ट्रिय सुरक्षा तथा रक्षा परिषद्का प्रमुख वार्ताकार रुस्तेम उमेरोभले बुधबारको छलफल व्यवहारिक समाधान र ठोस कदममा केन्द्रित रहेको बताए । वार्ता बिहीबार पनि जारी रहने बताइएको छ ।
वार्ताको स्वरूप सकारात्मक देखिए पनि युक्रेनभित्र रुसको आक्रमण रोकिएको छैन । युक्रेनी अधिकारीहरूका अनुसार हालै रुसको मिसाइल तथा ड्रोन हमलामा एक भिडभाडयुक्त बजारमा सात जनाको मृत्यु भएको छ । खपी नसक्नुको जाडोको मौसमबिच आक्रमणले राजधानी कीभको विद्युत् संरचनामा थप क्षति पुर्याएको छ ।
राष्ट्रपति भोलोदिमिर जेलेन्स्कीले साँझको सम्बोधनमा वार्ताले वास्तविक परिणाम दिनुपर्नेमा जोड दिँदै निकट भविष्यमा युद्धबन्दी आदान–प्रदान हुने अपेक्षा व्यक्त गरे । जनताले युद्ध अन्त्यतर्फ वास्तविक प्रगति महसुस गर्नुपर्ने उनको भनाइ थियो ।
शान्तिका लागि ढोका खुला रहेको रुसले बताएको छ । तर कीभले आफ्ना माग स्वीकार नगरेसम्म सैन्य कारबाही जारी रहने चेतावनी पनि दिएको छ। विश्लेषकहरूका अनुसार वार्ता आशाको संकेत भेटिए पनि मैदानको अवस्था र रुसको अडानले सम्झौतामा पुग्न कठिन देखिन्छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया