कास्की । पोखरामा आजदेखि २१ गतेसम्म दैनिक पाँच घण्टा विद्युत् आपूर्ति अवरुद्ध हुने भएको छ । नेपाल विद्युत् प्राधिकरणले कुँडहर सबस्टेशनको १३२ केभी बसबार स्तरोन्नति कार्य सुरु गरेपछि बिहान ६ बजेदेखि ११ बजेसम्म पोखराका अधिकांश क्षेत्रमा बिजुली काटिने भएको हो ।
पोखरा वितरण केन्द्रका प्रमुख जितेन्द्र यादवका अनुसार चार दिनसम्म चल्ने मर्मत कार्यका क्रममा कुँडहर ग्रिडबाट सञ्चालित सबै फिडरहरू सटडाउन हुनेछन् । “सबस्टेशनको बसबार मर्मत दीर्घकालीन सुधारका लागि आवश्यक छ, काम समयमै सकिएमा बिजुली छिटो सुचारु हुन्छ,” उनले बताए ।
यस अवधिमा विजयपुरदेखि हरिचोकसम्मका क्षेत्र पूर्ण रूपमा प्रभावित हुने वितरण केन्द्रले जनाएको छ । मर्मत कार्य सम्पन्न भएपछि नियमित विद्युत् आपूर्ति पुनः सुरु गरिनेछ ।
यता, पोखरा महानगरपालिकाले सहरको सौन्दर्यीकरणलाई ध्यानमा राख्दै बजार क्षेत्रलाई ताररहित बनाउने अभियानलाई अघि बढाएको छ । यसका लागि महानगरले इन्टरनेट सेवा प्रदायकहरूसँग सहकार्यको अपिल गरेको छ ।
नगरप्रमुख धनराज आचार्यले विद्युत् प्राधिकरणको तार भूमिगत गर्ने योजनासँग समन्वय गर्दै अव्यवस्थित रूपमा पोलमा झुण्डिएका तारहरू हटाउन एक महिनाको समय दिइएको जानकारी दिए । “निर्धारित समयभित्र तार नहटाए महानगरपालिकाले आफैँ व्यवस्थापन गर्नेछ,” उनले स्पष्ट पारे ।
महानगरका अनुसार एकीकृत रूपमा बिजुली, टेलिफोन र इन्टरनेट सेवा भूमिगत गर्न प्राविधिक समिति गठन गरी काम अघि बढाइनेछ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया