जेनजी अगुवा गुरुङ र शाहीको चेतावनीः सरकारले युवा पुस्ताको बलिदानलाई मजाक बनाए अर्को विद्रोहकाठमाडौँ । जेनजी रिभोलुसशन नेपालले अन्तरिम सरकारका जेनजी विद्रोहपछि पनि राजनीतिक, आर्थिक, प्रशासनिक, सुरक्षा र परराष्ट्र क्षेत्रमा कुनै सार्थक सुधार नहुनु लज्जास्पद भएको बताएका छन् । जेनजी रिभोलुसन नेपालका संयोजक सुधन गुरुङ र सहसंयोजक अर्जुन शाहीले प्रधानमन्त्रीलाई पत्र लेख्दै सरकारले जेनजी विद्रोहलाई बालुवामा टाउको घुसारेर बेवास्ता गर्दै पुरानै भ्रष्ट र स्वार्थी धन्दामा फर्किनु देशद्रोही बराबर भएको दाबी गर्दै इतिहासले माफी नदिने उल्लेख छ ।
जेनजी विद्रोहको बलिदानलाई मजाक बनाएको र त्यसले अर्को विद्रोहको बिउ रोपिने उल्लेख गर्दै पत्रमा भनिएको छ, ‘पुराना राजनीतिक दल र नेताहरूले भदौ २४ गतेको रक्तरञ्जित घटनालाई चटक्कै बिर्सेर, कुनै आत्मसमिक्षाबिनै आत्ममुग्धतामा डुब्नु घोर लापरबाही हो । यी नेताहरूले युवा पुस्ताको बलिदानलाई मजाक बनाएका छन् । जसले देशलाई फेरि अन्धकारतर्फ धकेलिरहेको छ। नयाँ र वैकल्पिक दलहरू पनि यसबाट उम्किन सक्दैनन् । उनीहरू देशका गम्भीर अर्थराजनीतिक, भू–राजनीतिक र सामाजिक सांस्कृतिक संकटहरूको दिगो समाधानको कुनै स्पष्ट योजना विनै पपुलिष्ट र आत्मकेन्द्रित ढंगलेअघि बढिरहेका छन् । यो विद्रोहको प्रमुख कारकलाई बेवास्ता गर्दै उनीहरूले युवाहरूलाई फेरि धोका दिइरहेका छन्, जसले आगामी विद्रोहको बीज रोप्दैछ ।’
अन्तरिम सरकारलाई ऐतिहासिक अवसरको रूपमा हेरिएको भएपनि जेनजीका तत्कालिक मागहरू पनि पूरा नगरी कुइरोको काग हराएको दाबी गरिएको छ । सरकारले हातेमालो नगरेमा देश फेरि उक्तपातपूर्ण संकटमा फस्ने पत्रमा उल्लेख छ ।
‘सरकारले सहिदहरूको रगतलाई पानीजस्तै बगाएको छ, जसले जनताको विश्वासलाई पूर्णरूपमा ध्वस्त बनाएको छ । यस्तो बेला सरकारले आफ्नो साँघुरो स्वार्थ त्यागेर हातेमालो नगरेमा देश फेरि रक्तपातपूर्ण संकटमा फस्नेछ ।’ असामान्य आन्तरिक र बाह्य स्थितिलाई बेवास्ता गर्दै अघि बढ्नु आत्मघाती हुने र ढिलो भएपछि पछुतो मात्र बाँकी रहने उल्लेख छ ।
प्रधानमन्त्रीलाई जारी गरेको खुला पत्रमा सरकारको पाखण्डी चरित्रलाई नाङ्गो बनाएको छ । यो पत्रले वर्तमान नागरिक सरकारलाई न्यायको नाममा धोका दिने गिरोहको रूपमा चित्रित गरेको उल्लेख छ । ‘सहिदको रगत अझै सुकेको छैन, तर राज्यले न्यायको मूल्य प्रणालीलाई नै कुल्चिरहेको छ, आन्दोलनले अपराधी ठहर गरेका व्यक्तिलाई राज्यले तामातुलसी चढाएर चोख्याउनु सहिदहरूको बलिदानमाथिको घोर अपमान हो । यो प्रवृत्तिले देशलाई पतनको खाडलतर्फ धकेल्दैछ’ पत्रमा उल्लेख छ ।
जेनजी रिभोलुसशन नेपालले प्रधानमन्त्री सुशीला कार्कीले शपथ ग्रहणका दिनको ‘एक–एकलाई कारबाही हुन्छ’ भन्ने आश्वासनलाई स्मरण गराएको छ । जेनजी आन्दोलनको क्रममा बालबालिकामाथि नरसंहार गर्नेहरु स्वतन्त्र घुमिरहनुले राज्यको अपराधीप्रतिको संरक्षणलाई प्रमाणित गरेको दाबी गर्दै ‘छानबिन आयोगको रिपोर्ट पर्खनु भनेको न्यायलाई अनिश्चितकालसम्म टार्नु हो । यो ढिलाईले आशंका होइन, निश्चित धोका जन्माएको छ जेनजी रिभोलुसनले जनाएको छ ।’
गुरुङ र शाहीले मन्त्रिपरिषद् विस्तारमा विवादित नामहरूको समावेशलाई अपराधीहरूको सम्मानको रूपमा आलोचना गरिएको छ र सरकारलाई नागरिक सरकार नभई एक व्यक्तिको स्वार्थी गिरोह बनेको बताउँदै यो प्रवृत्तिले देशलाई फेरि पुरानै संकटतर्फ धकेल्ने चेतावनी समेत दिएका छन् ।
युवाहरुका मागहरू सम्बोधन नगरेमा, नेपालको राजनीतिक स्थिरता मात्र होइन, सम्पूर्ण प्रणाली नै ध्वस्त हुने जेनजी रिभोलुसशन नेपालले चेतावनी दिएको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया