काठमाडौँ । विराटनगर किङ्सले दोस्रो संस्करणको नेपाल प्रिमियर लिग (एनपीएल) मा विजयी सुरुवात गरेको छ । मंगलबार भएको खेलमा विराटनगरले पोखरा एभेन्जर्समाथि ५३ रनको जित निकालेको हो ।
त्रिवि क्रिकेट मैदानमा विराटनगरले दिएको २२१ रनको लक्ष्य पछ्याएको पोखराले १८ ओभर ५ बलमा सबै विकेट गुमाउँदै १६७ रन बनायो ।
पोखराका लागि कप्तान कुशल भुर्तेलले ५९ रनको अर्धशतकीय पारी खेले । उनले ३१ बलमा ५ चौका र ४ छक्का प्रहार गरे । पोखराका लागि एडम रोसिन्टनले ३९ रन बनाउँदा डान डाउथवेडले २९ रनको योगदान गरे ।
यसअघि टस हारेर पहिले ब्याटिङ गरेको विराटनगरले निर्धारित ओभरमा २२० रनको विशाल स्कोर खडा गरेको थियो । यो कुनै पनि टोलीले एनपीएलमा बनाएको सबैभन्दा ठुलो स्कोर हो ।
विराटनगरको ब्याटिङले मैदानमा आक्रामक प्रदर्शन गर्यो । टोलीका ब्याटरहरूले उत्कृष्ट तालमेलका साथ छिटो रन बटुल्दै पोखरा एभेन्जर्सका बलरहरूलाई दबाबमा राखेका थिए ।
आजको खेलमा ओपनर लोकेश बम र मार्टिल गप्टिल चम्किए । यी दुईले आक्रामक पारी खेले । बमले ४८ बलमा ७ छक्का र एक चौका सहित ७२ रन बनाए भने गप्टिलले ३५ बलमा ३ चौका र ५ छक्का सहित ६१ रन बनाए ।
यस्तै शुभमन रन्जनेले १६ बलमा ३८ रन, बसिर अहमनले १३ बलमा २३ र ओपनर जर्ज मुन्सेले ६ बलमा १० रन र नारायण जोशीले ११ रन बनाए । पोखराका लागि म्याट टेलर ४ ओभरमा २ विकेट लिँदा ४८ रन खर्चिए । यस्तै सागर ढकाल र कुशल भुर्तेल र आकाश चन्दले एक एक विकेट लिए ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया