जनकपुरधाम । आदिदेव सूर्यको उपासना गरेर मनाइने महापर्व छठको दोस्रो दिन आज ‘खरना’ विधिपूर्वक मनाइँदै छ। आज दिनभर निराहार रहेपछि साँझ ब्रतालुहरूले चामल, दूध र सक्खर मिसाई बनाइएको खीर पकाई देवतालाई अर्पण गर्ने र त्यसपछि प्रसादस्वरूप ग्रहण गर्ने गर्छन्।
यो खीर घरका सबै सदस्यले प्रसादस्वरूप ग्रहण गर्छन् भने, पर्व नमनाउने घरमा पनि वितरण गर्ने परम्परा छ। चार दिनसम्म चल्ने यो पर्वको पहिलो दिन हिजो शनिबार ‘नहाय–खाय’ विधिबाट सुरु भएको थियो। सो दिन ब्रतालुहरूले स्नान गरी चोखो भोजन ग्रहण गरेर उपवासको तयारी गर्ने गर्छन्।
भोलि सोमबार छठ पर्वको तेस्रो र मुख्य दिन, ब्रतालुहरूले जलाशयमा गई अस्ताउँदो सूर्यलाई अर्घ्य अर्पण गर्नेछन्। मंगलबार बिहान उदाउँदो सूर्यलाई अर्घ्य दिएपछि छठ पर्व विधिपूर्वक सम्पन्न हुनेछ। छठ पर्वमा बाँसका ढाकी, डगरी, माटोका कोसिया–कुरवार र हाँडीजस्ता सामग्री प्रयोग गरिन्छ। प्रसादमा ठकुवा, भुसुवा, केरा, उखु, हल्दी, अदुवा, मिठाई र फलफूल अर्पण गरिन्छ।
अर्घ्य दिने ब्रतालुहरूले ४८ घण्टासम्म जल समेत नखाई कठोर उपवास बस्ने परम्परा रहेको छ। अत्यन्तै नियम–निष्ठा र पवित्रताका साथ सबै विधि पूरा गर्नुपर्ने भएकाले छठ पर्वलाई **‘निष्ठा र संयमको कठोर पर्व’**का रूपमा मानिन्छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया