काठमाडौँ । सिन्धुपाल्चोकमा भोटेकोशी नदीमा भ्यान खसेको छ।
शुक्रबार बिहान ५:२० बजे सिन्धुपाल्चोकको बलेफी गाउँपालिका-५ बलेफीस्थित अरनिको राजमार्गबाट बा १२ च ६५९४ नम्बरको डेलिभरी भ्यान भोटेकोशीमा खसेको हो।
जिल्ला प्रहरी कार्यालय सिन्धुपाल्चोकका अनुसार भ्यान र चालक नै बेपत्ता भएका छन्। चालक काभ्रेको पनौती नगरपालिका-१० पस्थली बस्ने २२ वर्षीय नवराज खुलाल रहेको खुलेको प्रहरीले जनाएको छ।
भ्यान सुकुटेमा रहेको सिन्धु दुग्ध डेरीले दूध संकलनमा प्रयोग गर्दै आएको थियो। शुक्रबार बिहान सुकुटेबाट खाडिचौर जाने क्रममा सडकबाट ५० मिटर तल खसेर बेपत्ता भएको प्रहरीले जनाएको छ।
भ्यानमा चालकमात्रै सवारी रहेको बुझिएको पनि प्रहरीले जनाएको छ। भ्यान र चालकको खोजी गर्न प्रहरी बरिष्ठ नायब निरीक्षक सुरेशप्रसाद गुप्ताको कमाण्डमा चार जना प्रहरी खटिएका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया