काठमाडौं । काठमाडौंको सुन्धारास्थित सिभिल मलको एउटा खेलौना पसलमा प्रहरीले खानतलासी गरेको छ। बिहीबार प्रहरी वृत्त जनसेवाको टोलीले सिभिल मलको पाँचौं तलामा रहेको द टोय स्टोरमा खानतलासी गरेको हो।
काठमाडौं प्रहरी परिसरका प्रवक्ता एसपी अपिलराज बोहराका अनुसार उक्त स्टोरमा सक्कलीजस्तै देखिने नक्कली हतियार बेचबिखन भइरहेको भन्ने सूचनाका आधारमा प्रहरीले खानतलासी लिएको थियो।
उक्त टोय स्टोर धादिङको नीलकण्ठ नगरपालिका-३ घर भई हाल काठमाडौंको बसुन्धारा बस्ने सन्तोषी श्रेष्ठले चलाउँदै आएकी थिइन्। एसपी बोहराका अनुसार खानतलासी गर्दा प्रहरीमाथि दुर्व्यवहार गरेको आरोपमा सोही पसलमा रहेका युवकलाई नियन्त्रणमा लिइएको छ।
प्रहरीले नियन्त्रणमा लिएको युवक काभ्रेको रोशी गाउँपालिका-३ घर भइ काठमाडौंको कलंकी बस्ने ३१ वर्षीय सुरज मगर हुन्। उनीमाथि महिला प्रहरीसहितको टोलीमाथि अभद्र व्यवहार गरी प्रहरीको कामकारबाहीलाई बाधा पुर्याएको आरोप छ।
उनलाई अभद्र व्यवहार कसुरमा तीन दिन म्याद थप भई अनुसन्धान अगाडि बढाइएको एसपी बोहराले जानकारी दिए। खेलौना पसलबाट प्रहरीले विभिन्न कम्पनी उल्लेख भएका ६ थान ‘सक्कलीजस्तै देखिने नक्कली’ हतियार पनि बरामद गरेको छ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया