काठमाडौं । दीपक श्रेष्ठ निर्देशित फिल्म ‘पर्खि बसें’को प्रदर्शन मिति तय भएको छ । यो फिल्म पुस २७ मा रिलिज हुने शुक्रबार विज्ञप्तिमार्फत जानकारी दिइएको छ ।
निर्देशक श्रेष्ठका अनुसार फिल्ममा चर्चित गीत ‘कालो चश्मा लाऊ है मैयाँ’लाई रिमेक गरेर समावेश गरिएको छ । ‘यो विशुद्ध प्रेमकथामा आधरित फिल्म हो । यसको सुरुवात गीतमार्फत गरेका छौं,’ निर्देशक श्रेष्ठले भने, ‘पर्खि बसें झैं यसमा पनि नयाँ कलाकारलाई लिएर काम गरेको छु । उहाँहरूलाई फिल्म उद्योगमा स्वागत गर्न विश्वस्त छु ।’
यो फिल्मबाट किरण श्रेष्ठ र अभिनेत्री रक्षा बुढाथोकीले डेब्यु गर्दैछन् । आफूले सुन्दै हुर्किएको गीतमा नृत्य गर्न पाउँदा खुसी लागेको रक्षाले बताइन् । ‘यो गीत मलाई निकै मन पर्छ । अहिले यसमै नृत्य गर्न पाएँ । प्रतिक्रियाको पर्खाइमा छु,’ रक्षाले भनिन् । अभिनेता किरणले पनि लभ स्टोरीमा प्रस्तुत हुन पाउँदा खुसी व्यक्त गरे ।
‘कालो चश्मा’ गीत फिल्म ‘बादलपारि’मा समावेश लोकप्रिय गीत हो । गीतमा सुरेन्द्र राणाको शब्द र शम्भुजीत बास्कोटाको संगीत छ । रिमेक भर्सनमा प्रमोद खरेल र मिलन नेवारको स्वर छ ।
पाटन र भक्तपुर दरबार क्षेत्रमा छायांकन गरिएको गीतको नृत्य निर्देशन निशा रसाइलीले गरेकी छिन् । निर्देशक श्रेष्ठले पुराना सर्जकलाई सम्मान गर्दै गीतको भावमै रहेर नयाँ पुस्ताका लागि गीत र भिडियो तयार गरिएको बताए ।
‘मैले नयाँ कलाकारसँग पहिला पनि काम गरेको छु । अहिले पनि उहाँहरूको सक्षमता देखेर काम गराएको छु । यसमा अहिलेको पुस्ताको प्रेम कथा देखाईएको छ,’ उनले भने ।
रोमान्स फिल्म्स र तपश्री फिल्म्स (सिक्किम)को संयुक्त व्यानरमा निर्माण गरिएको फिल्ममा अनिशा रसाइली, शिव श्रेष्ठ लगायतका कलाकारले अभिनय गरेका छन् । यसको छायांकन नेपालसँगै सिक्किममा गरिएको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया