काठमाडौं । हमासद्वारा मारिएका नेपाली युवा विपिन जोशीको शव अन्तर्राष्ट्रिय रेडक्रस सोसाइटी (ICRC) ले इजरायली सेनालाई जिम्मा लगाएको छ। हाल उनको शव तेल अवीभस्थित सैनिक अस्पतालमा राखिएको छ।
त्यहाँ डिएनए परीक्षणलगायतका आवश्यक प्रक्रिया पूरा गरेपछि मात्रै शव नेपाल पठाउने तयारी भइरहेको इजरायलस्थित नेपाली दूतावासले जनाएको छ। इजरायलका लागि नेपाली राजदूत धनप्रसाद पण्डितका अनुसार, “हमासले विपिन जोशीको भनेर बुझाएको शव डिएनए परीक्षणपछि मात्र पुष्टि हुनेछ।
रिपोर्ट आउन करिब चार घण्टा लाग्ने भनिएको छ। त्यसपछि मात्रै नेपाल पठाउने प्रक्रिया सुरु हुन्छ,” उनले भने। उनका अनुसार शवलाई इजरायल सरकारले नै कफिनमा बन्द गरेर नेपाल पठाइदिने तयारी गरेको छ। त्यसका लागि अझै केही दिन लाग्ने अनुमान गरिएको छ।
अध्ययनका सिलसिलामा इजरायल पुगेका कञ्चनपुरका विपिन जोशी सन् २०२३ अक्टोबर ७ मा हमासले किबुत्ज क्षेत्रमा गरेको आक्रमणका क्रममा बन्धक बनाइएका थिए। सो आक्रमणमा १० जना नेपाली विद्यार्थी मारिएका थिए भने हमास लडाकुहरूले विपिनलाई आफूसँगै लगेका थिए।
त्यसयता उनको अवस्था अज्ञात रहँदै आएको थियो। तर इजरायल–हमास युद्धविरामपछि मंगलबार बिहान इजरायली सेनाका अधिकारीहरूले विपिनको मृत्यु भएको औपचारिक जानकारी दिएका थिए। बन्दीहरू मुक्त गर्ने क्रममा हमासले मंगलबार विपिनको शव रेडक्रसमार्फत हस्तान्तरण गरेको थियो।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया