काठमाडौँ । नेपालमा प्रजातन्त्र पुनर्स्थापना भएको ऐतिहासिक दिनको सम्झनामा आज देशभर विविध कार्यक्रमहरू आयोजना गरिँदै छन्। वि.सं. २०४६ सालको चैत २६ गते ३० वर्षीय पञ्चायती शासनको अन्त्य गर्दै नेपालमा बहुदलीय प्रजातान्त्रिक व्यवस्था पुनर्स्थापना भएको थियो।
राजा महेन्द्रले वि.सं. २०१७ सालको पुस १ गते लागू गरेको पञ्चायती प्रणालीलाई नेपाली कांग्रेसको नेतृत्वमा संयुक्त बाममोर्चाले ५० दिनसम्म चलाएको जनआन्दोलनमार्फत विस्थापित गरेका थिए। यो आन्दोलन २०४६ फागुन ७ गते सुरु भई चैत २६ गते सम्पन्न भएको थियो।
आन्दोलनका क्रममा नेपाली कांग्रेसका नेता गणेशमान सिंहले निर्णायक भूमिका निर्वाह गरेका थिए। अन्ततः तत्कालीन राजा वीरेन्द्रले चैत २६ गते राष्ट्रका नाममा सम्बोधन गर्दै बहुदलीय व्यवस्थाको पुनर्स्थापनाको घोषणा गरेका थिए।
यस दिनको स्मरणमा हरेक वर्ष चैत २६ गते जनआन्दोलन दिवसका रूपमा मनाइन्छ। यस वर्ष पनि विविध राजनीतिक दल, नागरिक समाज, र विभिन्न संघसंस्थाहरूले कार्यक्रमको आयोजना गरेका छन्।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया