काठमाडौँ । संसद्को शिक्षा, स्वास्थ्य तथा सूचना प्रविधि समितिमा रहेको विद्यालय शिक्षा विधेयकमाथि तिहारपछि मात्र दफावार छलफल हुने भएको छ । विधेयकमाथि संशोधन हालेका संशोधनकर्तासँगको छलफल सकिएपछि समितिले तिहारपछि दफावार छलफल अगाडि बढाउने भएको हो ।
समिति सचिव दशरथ धमलाले शिक्षा विधेयकमा तिहारपछि दफावार छलफल हुने बताए । असोज ४ गते संशोधनकर्तासँग अन्तिम छलफल भएको थियो । संशोधन हालेका १५२ जना सांसदहरूले संशोधन हालेका थिए । तीमध्ये ११२ जना सांसदहरूले मात्रै छलफलमा भाग लिए । अन्यलाई पटक पटक बोलाउँदा समेत नआएपछि समितिले संशोधनकर्तासँगको छलफल टुङ्ग्याएको हो ।
तत्कालीन शिक्षा, विज्ञान तथा प्रविधिमन्त्री अशोककुमार राईले २०८० भदौ २७ गते संसद्मा विद्यालय शिक्षा विधेयक पेस गरेका थिए । संसदले विधेयकमाथि छलफलका लागि शिक्षा समितिमा पठाउने निर्णय गरेसँगै २०८० पुस ८ गतेदेखि समितिमा छलफल सुरु भएको थियो ।
संशोधन हाल्ने तर, छलफलका लागि पटक पटक बोलाउँदा समेत सांसदहरू नआएपछि समितिले अब दफावार छलफलको प्रक्रिया अगाडि बढाउन लागेको हो ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया